پووتین: ڕازی نین بە هەموو بەندەکانی پلانی ئەمریکا بۆ کۆتاییهێنان بە جەنگ

ئاڤا نیوز

سەرۆکی ڕووسیا دوای کۆبوونەوەی پێنج کاتژمێری لەگەڵ شاندی دانوستانکاری ئەمریکا لە مۆسکۆ، ڕایگەیاند کە وڵاتەکەی لەگەڵ بەشێک لە پلانی ئەمریکا بۆ کۆتاییهێنان بە جەنگی ئۆکراینا ڕازی نین.

چیرۆکی سەرەکی: ڤلادیمێر پووتین، سەرۆکی ڕووسیا لە لێدوانێکدا بۆ میدیایەکی هیندی وتوویەتی بە شاندەکەی ئەمریکایان ڕاگەیاندووە دەتوانن گفتوگۆ لەسەر هەندێک خاڵ بکەن، بەڵام ناتوانن بە هەمووی ڕازی بن. سەرۆکی ڕووسیا جارێکی دیکە جەختی کردووەتەوە لەوەی کە دەبێت هێزەکانی ئۆکراینا بەتەواوی لە هەرێمی دۆنباس بکشێنەوە، کە ئێستا ڕووسیا 85%ـی ئەو ناوچەیەی کۆنترۆڵ کردووە.

ئەوەی پێویستە بیزانیت: لای خۆیەوە دۆناڵد ترەمپ، سەرۆکی ئەمریکا دانوستانەکانی بە تاڕادەیەک باش وەسف کرد و ئاماژەی بەوە دا کە پووتین خوازیاری کۆتاییهێنانە بە جەنگەکە، بڕیارە شاندی ئەمریکا دوای مۆسکۆ، لە فلۆریدا لەگەڵ بەرپرسانی ئۆکراینا کۆببنەوە.

هاوکات ڤۆلۆدیمێر زێلێنسکی، سەرۆکی ئۆکراینا ڕەتیکردەوە دەستبەرداری هیچ خاکێکی وڵاتەکەی ببێت و داوای گرەنتی ئەمنی دەکات.

لەلایەکی دیکەوە: گۆڤاری (دێر شپیگڵ)ـی ئەڵمانی ئاشکرای کردووە کە سەرکردەکانی ئەوروپا نیگەرانن لە دانوستانەکانی ئەمریکا و ترسیان هەیە واشنتن لەسەر حسابی خاکی ئۆکراینا سازش بۆ ڕووسیا بکات، بۆیە هۆشدارییان داوەتە زێلێنسکی کە لە ڕۆژانی داهاتوودا زۆر وریا بێت.