پارێزگاری هەولێر: مەترسییەکانی دروستبوونی لافاو کەمکراونەتەوە

ئاڤا نیوز

پارێزگاری هەولێر دووپاتی دەکاتەوە، مەترسییەکانی دروستبوونی لافاو لە هەولێر کەمکراونەتەوە و پلانێکی تایبەتیش بۆ باری لەناکاو ئامادەکراوە.

وێنە گەورەکە: ساڵانە لە سەرەتای وەرزی پاییز و پێش دەستپێکردنی بارانبارین، لە شاری هەولێر ڕیکاری پێویست بۆ کەمکردنەوەی مەترسی لافاو دەگیرێنەبەر، جگە لە جێبەجێکردنی پرۆژە ستراتیژییەکان، کەندە سرووشتییەکان و ڕێڕەوی ئاوی باران و ئاوەڕۆکانیش پاک دەکرێنەوە.

لێدوانی فەرمی: ئومێد خۆشناو، پارێزگاری هەولێر، گوتی: بۆ ڕووبەڕووبوونەوەی مەترسی دروستبوونی لافاو، لەسەر دوو ئاست ئامادەکاریمان کردووە:

ئاستی یەکەمیان: لە ساڵانی ڕابردوو ژمارەیەک پرۆژە ستراتیژیی جێبەجێ کراون، لە پۆند و بەنداو و کردنەوەی ڕێڕەوی سرووشتی و دروستکردنی چەندین ئاوەڕۆی سندوقی و لولەیی، هەموو ئەو جێگایانەی وەکو خاڵی لاواز دەستنیشان کراون، کێشەیان چارەسەر کراوە.

ئاستی دووەم: پلانێکی وەرزییە و هەموو ساڵێک لە سەرەتای وەرزی پاییز، تیمە هاوبەشەکانی لایەنە پەیوەندیدارەکان لە شارەوانییەکان و بەڕێوەبەرایەتیی ئاوەڕۆ و بەڕێوەبەرایەتیی ئاودێری و بەڕێوەبەرایەتیی ڕێگاوبان، هەموو ئەو دام و دەزگایانە کار بۆ چارەسەرکردنی کێشەکان دەکەن بە تایبەت کردنەوەی ڕێڕەوی و ئاوەڕۆکان.

گۆشەیەکی دیکەی دیمەنەکە: پارێزگاری هەولێر ئاماژەی بۆ ئەوەش کرد: بە هەماهەنگی هەموو لایەنە پەیوەندیدارەکان پلانێکی تایبەت ئامادەکراوە، بۆ هەر بارێکی لەناکاو، وەک بارینی بارانێکی زۆر لە ماوەیەکی کەمدا، کە مەترسی لافاو دروست بکات، بۆ ئەمەش ئامادەکاری پێویست گیراوەتەبەر.