ڕاپۆرتی کۆتایی بۆ پرۆسەی ئاشتی لە پەرلەمانی تورکیا ئامادە دەکرێت

ئاڤا نیوز

بەمەبەستی ئامادەکردنی ڕاپۆرتی پەیوەندیدار بە پرۆسەی ئاشتی لەلایەن کۆمیسیۆنە پەرلەمانییەکەی تورکیا ئاک پارتی، جەهەپە و مەهەپە ڕاپۆرتی خۆیان ئامادەکردووە و دەم پارتیش بەردەوامە لە ئامادەکردنی ڕاپۆرتەکەی.

وێنە گەورەکە: دوای کۆبوونەوەی شاندێکی کۆمیسیۆنەکەی پەرلەمانی تورکیا لەگەڵ عەبدوڵڵا ئۆجەلان، کۆتایی بە قۆناغی یەکەمی کاری کۆمیسیۆنی یەکڕیزیی نیشتمانی، برایەتی و دیموکراسی هات کە گوێگرتن بوو لە سەرنج  و پێشنیازەکان و لە ئێستادا ئامادەکاری دەکرێت بۆ نووسینی ڕاپۆرتی کۆتایی تایبەت بە پرۆسەی ئاشتی.

بڵاوکراوەی فەرمی: میدیاکانی تورکیا ئاماژە بەوە دەدەن جگە لە جەهەپە، ئاک پارتی'ی دەسەڵاتدار و مەهەپەش (ڕاپۆرتەکەی مەهەپە 116 لاپەڕەیە) ڕاپۆرتی خۆیان و دەم پارتیش بەردەوامە لە ئامادەکارییەکانی بۆ ڕاپۆرتەکەی کە 125 لاپەڕەیە.

بە تەنیشت ئەم بابەتەوە: لە 19ەمین کۆبوونەوەی کۆمیسیۆنەکە کە لە 4-12-2025 ئەنجام درا، جەهەپە وەک گەورەترین پارتی ئۆپۆزسیۆنی تورکیا ڕاپۆرتێکی 19 خاڵی خستەڕوو، هەریەک لە ئاک پارتی و مەهەپەش سەرقاڵی دوایین پاکنووسی ڕاپۆرتەکانیانن.

پێویستە ئەمەش بزانیت: لە دوای ئامادەکردنی ڕاپۆرتی پارتەکان، جارێکی دیکە کۆمیسیۆنەکە کۆدەبێتەوە و بڕیاری پێکهێنانی لیژنەیەک بۆ نووسینەوەی ڕاپۆرتی کۆتایی دەدات و ئەو خاڵانە لە ڕاپۆرتەکەدا جێگیر دەکرێن کە کۆدەنگی پارتەکانیان لەسەرە.

ڕاپۆرتەکەی جەهەپە باسی چی دەکات: ڕاپۆرتەکەی بە ناوی پاکێجی "بە دیموکراسیکردنی تورکیا" خرایە ڕوو و بەشێک لەو داواکارییانەی خستوونیەتە ڕوو هەمان ئەو داواکارییانەن کە زیاتر لە ساڵێکە دەم پارتی داوایان دەکات: 

- پرسی کورد بە ڕێگاچارەی ئاشتییانە چارەسەر بکرێت.

- کۆتایی بهێنرێت بە دانانی قەییووم بۆ سەرۆک شارەوانییە هەڵبژێرراوەکان.

- ئەو زیندانییە سیاسییانە ئازاد بکرێن کە دادگای مافی مرۆڤی ئەوروپا و دادگای دەستووریی تورکیا بڕیاری ئازادکردنی داون. بەم پێیە دەبێت سەڵاحەددین دەمیرتاش و زیندانییانی دۆسیەی کۆبانێ ئازاد بکرێن.

- بەربەستەکانی بەردەم هەموارکردنەوەی دەستوور هەڵبگرێن بۆ هێنانەدی ئاشتی کۆمەڵایەتی.

- یاسای بەرەنگاربوونەوەی "تیرۆر" بە پشتبەستن بە یاسا کاری پێ بکرێت نەک بە شێوەی هەڕەمەکی.

- بەربەستەکانی بەردەم کارکردنی ئازادانەی ڕێکخراوەیی لە تورکیا هەڵبگیرێن.