سووننەکان چوار مەرج بۆ کاندیدی پۆستی سەرۆک پەرلەمان دیاری دەکەن

ئاڤا نیوز

هاوپەیمانی نیشتیمانیی سوننەکان چوار مەرجی بۆ کاندیدی پۆستی سەرۆکی پەرلەمانی عێراق داناوە و مەرجەکانیش بەجۆرێکن یەکلاییکردنەوەی پۆستەکە خێراتر دەکەن، سەرکردەیەکی شیعەکانیش دەڵێت: سەرەتای ساڵی داهاتوو هەرسێ سەرۆکایەتییەکە یەکلایی دەکرێنەوە.

وێنە گەورەکە: چاوەڕێ دەکرێت لە دوو هەفتەی داهاتوودا سەرجەم ڕێکارەکانی پەیوەست بە هەڵبژاردن تەواو بکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

لێدوانی فەرمی: عەزام حەمدانی، ئەندامی هاوپەیمانی عەزم بە ڕۆژنامەی نیمچەفەرمی عێراق (ڕۆژنامەی سەباح)ی ڕاگەیاندووە، هەوڵەکان بۆ یەکلاییکردنەوەی کاندیدی پۆستی سەرۆکی پەرلەمان بەردەوامە و چوار مەرج بۆ کاندیدی پۆستەکە دیاریکراون ئەوانیش بریتین لە: 

- دەبێت پۆستەکە لەلایەن سەرکردەیەکی هێڵی یەکەمی سوونییەوە بەڕێوەببرێت

- ئەوەی پۆستەکە وەردەگرێت دەبێت سەرکردەی سیاسی کاریگەر بێت

- دەبێت پۆستەکە بۆ بەرژەوەندی کەسی و حیزبی بەکارنەهێنرێت

- دەبێت گەرەنتی مافە دەستوورییەکانی پێکهاتەی سوونی بکات

ئەوەشی خستووەتەڕوو، پێداگری هەندێک لایەن لەسەر وەرگرتنی پۆستەکە بەهۆی ئەوەی زۆرینەی کورسییان (لەناو پێکهاتەی سوونییدا) هەیە، یەکێکە لە ئاستەنگییەکان کە تائێستا کاندیدی پۆستی سەرۆکی پەرلەمان یەکلایی نەبووەتەوە، بەڵام کاری هاوپەیمانێتی سووننەکان لەسەر بنەمای هاوبەشی و گفتوگۆ بەردەوامە.

لەلایەکی دیکەوە: سەلام زوبەیدی، وتەبێژی هاوپەیمانی نەسری شیعەکان دەڵێت، چوارچێوەی هەماهەنگی بۆ یەکلاییکردنەوەی پۆستی سەرۆکوەزیران پابەندە بە وادە دەستوورییەکان، ئاماژەکانیش بۆ ئەوە دەچن سەرەتای ساڵی داهاتوو یەکلاییکردنەوەی سەرۆکایەتییەکان تەواو بکرێت.

گۆشەیەکی دیکەی دیمەنەکە: عیماد جەمیل، ئەندامی تیمی ڕاگەیاندن لە کۆمیسیۆنی هەڵبژاردنەکان ڕایگەیاند، دەستەی دادوەری هەڵبژاردنەکان لە کۆی 872 تانە کەسەر لە ئەنجامی کۆتایی هەڵبژاردنی پەرلەمانی عێراق تۆمارکرابوون، تائێستا 800 تانەی یەکلایکردووەتەوە و ئەمڕۆ یەکشەممە تەواوی تانەکان یەکلایی دەکاتەوە، ئەو تانانەشی ماون کاریگەرییان لەسەر ئەنجامەکانی هەڵبژاردن نابێت.