پرۆژەیەکی ستراتیژی کێشەی پەنگخواردنەوەی ئاو لە پردی سەیداوە چارەسەر دەکات

ئاڤا نیوز

 

بەڕێوەبەری ئاوەڕۆی هەولێر دەڵێت، لە ساڵانی ڕابردوو ژێر پردی سەیداوە لە هەولێر یەکێک بوو لەو شوێنانەی پەنگخواردنەوەی ئاو تیایدا ڕووی دەدا، بڕیار دراوە پڕۆژەیەکی ستراتیژی بۆ ئەو شوێنە بکرێت و ئەم کێشەیە لە بنەڕەتەوە چارەسەر بکرێت.

وێنە گەورەکە: ساڵانە لە شارەکانی هەرێمی کوردستان لەگەڵ دابارینی ڕێژەیەکی زۆری باران، لە هەندێ شوێن پەنگخواردنەوەی ئاو دروست دەبێت، لە بەشێکی ئەو شوێنانە لەڕێگەی فراوانکردنی ڕێڕەوی ئاوەڕۆ ئەم گرفتانە چارەسەر کراون، لە بەشێکی دیکە چاوەڕێ دەکرێت لە ڕێگای پڕۆژەی نوێ چارەسەر بکرێن.

 

لێدوانی فەرمی: زەردەشت عەبدولخاڵق، بەڕێوەبەری ئاوەڕۆی هەولێر بە ئاڤا میدیای گوت، یاداشتێکمان داوەتە ئەنجوومەنی وەزیران بۆ ئەنجامدانی پڕۆژەیەکی ستراتیژی بە بەهای 10 ملیار دینار کە خۆی دەبینێتەوە لە دروستکردنی ڕێڕەوێکی فراوان بۆ چارەسەرکردنی ئاوی ژێر پردی سەیداوەی هەولێر. تەنیا ڕەزامەندی ماوە، چاوەڕێ دەکرێت لە سەرەتای ساڵی ئایندە دەست بە پڕۆژەکە بکرێت.

 

خاڵە ئەرێنییەکان: پڕۆژەکە بەجۆرێکە ئاوەڕۆی ژێر پردی سەیداوە تێکەڵ دەکرێت لەگەڵ ڕێڕەوی ئاو لە شەقامی 60 مەتری نزیک سایلۆی هەولێر.

 

-بۆ شەپۆلی ئەم هەفتەیە لە هەولێر 14 شوێن دیاریکراون تیمی ئێشکگری لێ دانراوە، ئەو شوێنانە ساڵانە پەنگخواردنەوەی ئاو لێی ڕوودەدات. جگە لەوە تیمەکان بەردەوام زێرابەکان پاک دەکەنەوە و هەموو ئامادەکارییەک کراوە بۆ دڵنیابوون لە کەم کردنەوەی حاڵەتەکانی پەنگخواردنەوەی ئاو.

باکگراوند: مانگی شوباتی ساڵی 2024 بەهۆی باران بارینێکی زۆر پەنگخواردنەوەی ئاو لەژێر پردی سەیداوەی هەولێر دروست بوو، بەهۆیەوە 11 ئۆتۆمبێل زیانیان بەرکەوت. بۆیە ساڵانە ڕێکاری نوێ بۆ ڕێگری لە دووبارەبوونەوەی ئەم حاڵەتە پەیڕەو دەکرێت.