زیاتر لە 50 هاووڵاتی ئێرانی لە ئەمریکاوە دەگەڕێندرێنەوە

ئاڤا نیوز

وتەبێژی وەزارەتی دەرەوەی ئێران ڕایگەیاند، لە چەند ڕۆژی داهاتوودا زیاتر لە 50  هاووڵاتی ئێرانی بەهۆی سیاسەتە تووندەکانی کۆچبەریی ئیدارەی دۆناڵد ترەمپەوە، لە ئەمریکاوە دەگەڕێنەوە بۆ وڵاتەکەیان.

وێنە گەورەکە: لە نوێترین بڕیاری نوێی دەسەڵاتدارانی ئەمریکا، ئەو وڵاتە ڕاگرتنی پڕۆسەی پێدانی "گرین کارت" و ڕەگەزنامە بە هاووڵاتیانی 19  وڵات ڕاگەیاند ، کە ئێران یەکێکە لەو وڵاتانە.

لێدوانی فەرمی: ئیسماعیل بەقایی، وتەبێژی وەزارەتی دەرەوەی ئێران لە کۆنگرەی ڕۆژنامەوانی هەفتانەیدا ئاشکرای کرد، لە ڕۆژانی داهاتوودا 50 بۆ 55 هاووڵاتی ئێرانی دەگەڕێنەوە. بەقایی ڕێکارەکانی ئەمریکای بەرامبەر هاووڵاتیانی بیانی بە نەژادپەرستانە وەسف کرد و ڕایگەیاند، گوشارەکان لەسەر ئێرانییەکان پاڵنەری سیاسییان لە پشتە و پێچەوانەی مافەکانی مرۆڤن.

ئەوەی پێویستە بیزانیت: بەقایی ئاماژەی بەوەشدا، ئەو هاووڵاتیانە بەهۆی گوشاری زۆری دەسەڵاتدارانی ئەمریکا پەیوەندییان بە نوسینگەی پاراستنی بەرژەوەندییەکانی ئێران لە واشنتن کردووە و ئامادەیی خۆیان بۆ گەڕانەوە دەربڕیوە.

زانیاریی زیاتر: ئەمە دووەم گرووپی ئێرانییەکانە کە لە ماوەی ڕابردوودا دەگەڕێندرێنەوە، لە مانگی ئەیلولیشدا 120 هاووڵاتی ئێرانی دیپۆرت کرابوونەوە، بەگوێرەی زانیارییەکانی پێشووی وەزارەتی دەرەوەی ئێران، مەترسی دیپۆرتکردنەوە لەسەر نزیکەی 400  ئێرانی دیکەش هەیە کە زۆربەیان تۆمەتی چوونە ژوورەوەی  نایاسایی وڵاتیان دراوەتە پاڵ.