یەكگرتووی ئیسلامی و ڕەوتی هەڵوێست و كۆمەڵی دادگەری كۆبوونەوە

ئاڤا نیوز

ئەمڕۆ لە شاری هەولێر هەر یەک لە یەكگرتووی ئیسلامی و ڕەوتی هەڵوێست و كۆمەڵی دادگەری، دەربارەی هەماهەنگی و بەهێزکردنی پێگەی کورد لە بەغدا، كۆبوونەوە.
 
چیرۆکی سەرەکی: ئەمڕۆ یەكشەممە، لەبارەگای سەركردایەتیی كۆمەڵی دادگەریی كوردستان لە هەولێر، یەكگرتووی ئیسلامی كوردستان، ڕەوتی هەڵوێست، كۆمەڵی دادگەریی كوردستان كۆبوونەوە، دەربارەی هەماهەنگی و كاری هاوبەش لە بەغدا، گفتوگۆیان كرد.

لێدوانی فەرمی: د.سەڵاحەددین بابەكر، وتەبێژی یەكگرتووی ئیسلامی كوردستان بە ئاڤای گوت، کۆبوونەوەکە دەرهاوێشتەی ئەو کۆبوونەوانە بوو کە 26ـی مانگی ڕابردوو دەستپشخەرییەکمان ڕادەستی لایەنە براوەکانی هەڵبژاردنی پەرلەمانی عێراق کرد، شەش خاڵی لەخۆگرتبوو بۆ بەهێزکردنی پێگەی کورد لە بەغدا و دروستکردنی ماڵێکی کوردی هاوشێوەی ماڵێ سووننە و شیعە، ئێستا چاوەڕوانی وەڵامی لایەنە سیاسیەکانین بۆئەوەی ئەگەر بە بیرۆکەی دیکە خاڵە هاوبەشە چارەنووسسازەکان دەوڵەمەندتر بکەین.

لەلایەکی دیکەوە: شوان ڕابەر، ئەندامی سەرکردایەتیی کۆمەڵی دادگەری بە ئاڤای گوت، "گفتوگۆمان کرد دەربارەی هەماهەنگی و کاری هاوبەش لە بەغدا و چارەسەرکردنی کێشەکان، پاراستن و بەدەستهێنانی شایستە داراییەکان و مافە دەستووریەکانی خەڵکی هەرێمی کوردستان".