پارێزەرانی كەلار بایکۆتی دادگا دەکەن

ئاڤا نیوز

بەهۆی دروستبوونی گرفت لەنێوان پارێزەر و دادوەرێکی دادگای بەرایی کەلار، بڕیاری دەستبەسەركردنی پارێزەرەكە بۆ ماوەی 24 كاتژمێر لەلایەن ئەو دادوەرەوە دەدرێت، ئەو بڕیارەش سەرجەم پارێزەرانی شارۆچكەی كەلار توڕە دەكات و هەڵوێست وەردەگرن.

زانیاریی پەیامنێر: بەپێی ئەو زانیارییانەی دەست هونەر فارس، پەیامنێری ئاڤا لە ئیدارەی گەرمیان كەوتوون، گرفتەكە بەهۆی ئەوەوە ڕوویداوە کە پارێزەر جومعە داوود، ویستوویەتی سەیركردنی دۆسیەیێك لەلای ئەو دادوەرەوە بۆ لای دادوەرێكی دیكە بگۆڕێت، بەو هۆیەوە دادوەرەكە بڕیاری دەستگیركردنی پارێزەرەكەی داوە بۆ ماوەی شەو و ڕۆژێک، ئێستا لە گرتووخانەی گەرمیانە و ئەمڕۆ ماوەی ڕاگرتنەكەی تەواو دەكات.

زانیاریی بەدەستهاتوو: یەکێک لە پارێزەرانی ئەندام لە ژووری پارێزەرانی كەلار بە ئاڤای ڕاگەیاند، دادوەرەکە بە پارێزەرەکەی وتوە داوای لێبوردنی لێبکات لەبەرامبەر ئەوەی هەوڵیداوە دۆسیەکە بۆ لای دادوەرێکی دیکە بگوازێتەوە، بەڵام پارێزەرەکە ئامادە نەبووە داوای لێبوردن بكات و دادوەریش بڕیاری ڕاگرتنی داوە.

لێدوانی فەرمی: كارزان مستەفا، سەرۆكی ژووری پارێزەرانی كەلار بۆ ئاڤا ڕایگەیاند، هەموو پارێزەرێک پارێزبەندی هەیە و نابێت بە هەر بیانووێك ڕابگیرێت، بۆیە ڕۆژی یەكشەممە، بایكۆتی كاری ڕۆژانەمان كرد لە سەرجەم دادگاكانی سنووری سەرۆكایەتیی دادگای تێهەڵچوونەوەی ناوچەی كەركووك - گەرمیان، تاكو یەكلاییكردنەوەی كێشەكە.

لەلایەكی دیكەوە: ئاڤا هەوڵیدا پەیوەندی بە دادوەرەكەوە بكات، بەڵام وەڵامی پەیوەندییەكانی نەدایەوە.