تیمی چاودێری دارایی عێراق سەردانی سلێمانی و دهۆک دەکەن

ئاڤا نیوز

کارەکانی تیمی چاودێریی دارایی عێراق بەردەوامە، بڕیارە سەردانی پارێزگاکانی سلێمانی و دهۆکیش بکەن بۆ ئەوەی پێداچوونەوە بە خەرجی و داهاتەکانی هەموو مانگەکانی ئەمساڵ بکەن.

وێنە گەورەکە: نزیکەی هەفتەیەکە تیمێکی چاودێریی دارایی عێراق بۆ وردبینی لە خەرجی و داهاتەکانی حکومەتی هەرێمی کوردستان لە هەولێرن، دەیانەوێت پێداچوونەوە بە خەرجی و داهاتەکانی هەموو مانگەکانی ئەمساڵ بکەن، تیمەکە بەسەر چەند لیژنەیەکدا دابەش بوون و سەردانی دامەزراوەکان دەکەن.

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای وت، "کارەکانی تیمەکە لە قۆناغی کۆتاییدایە، لەم هەفتەیەدا سەردانی سلێمانی و دهۆکیش دەکەن، بەراوردی خەرجی و داهاتی فەرمانگەکان لەگەڵ داتای وەزارەتی دارایی دەکەن."

ئەوەی پێویستە بیزانیت: ساڵانە چەند جارێک تیمێکی دیوانی چاودێری دارایی عێراق، سەردانی هەرێمی کوردستان دەکەن، پێداچوونەوە بە تەرازووی پێداچوونەوە - میزان موراجەعە دەکەن، واتا پێداچوونەوە دەکەن بە خەرجی و داهاتەکانی سەرجەم وەزارەت و فەرمانگەکانی حکومەت، ئەمساڵ بۆ دووەم جارە دێنە هەرێمی کوردستان و ڕەنگە 20 ڕۆژ بمێننەوە.