زانیاریی تایبەت: یەكێتی بە پاكێجێكی نوێ بۆ پێكهێنانی حكومەت لەگەڵ پارتی كۆدەبێتەوە

ئاڤا نیوز

سەرچاوەیەكی تایبەت بۆ ئاڤا ئاشكرای دەكات، یەكێتی بە پاكێجێكی نوێوە بۆ پرسی پێكهێنانی كابینەی نوێی حكومەتی هەرێمی كوردستان، لەگەڵ پارتی كۆدەبێتەوە و كۆبوونەوەكەش لە سلێمانی دەبێت.

چیرۆكی سەرەكی: یەكێتیی نیشتمانیی كوردستان، دوای گەڕانەوەی قوباد تاڵەبانی لە بەغدا، لەسەر ئاستی مەكتەبی سیاسی كۆدەبێتەوە و پرسی پێكهێنانی كابینەی نوێی حكومەتی هەرێمی كوردستان تاوتوێ دەكات، بەر لەوەی كۆبوونەوەیەكی دیكە لەگەڵ شاندی پارتی بكات، پاكێجێكی نوێ ئامادە دەكات و دەیخاتە سەر مێزی گفتوگۆ.

زانیاریی پەیامنێر: چۆمان مەحموود پەیامنێری ئاڤا لە سلێمانی لەگەڵ ئەندامێكی سەركردایەتیی یەكێتی قسەیکردووە دەڵێت: پاكێجە نوێیەكەی یەكێتی كۆمەڵێك گۆڕانكاری زۆری تێدایە، بەپێی ناوەڕۆكەكەی هەردوو پرسی پێكهێنانی كابینەی نوێی حكومەتی هەرێمی كوردستان و حكومەتی عێراق بەیەكەوە باسكراوە.

زانیاریی زیاتر: ئەو ئەندامەی مەكتەبی سەركردایەتیی یەكێتی باسی لەوەشكردووە، نزیكبوونەوە لەنێوان بۆچوونەكانی یەكێتی و پارتی هەیە بەتایبەت دوای دانیشتنەكەی شاندی هەردوو حیزب لە ماڵی قوباد تاڵەبانی لە شاری هەولێر.

پەیوەست بەم بابەتە: دەرباز كۆسرەت ڕەسول، ئەندامی مەكتەبی سیاسیی یەكێتی ڕایگەیاندووە، لە پرسی پێكهێنانی كابینەی نوێی حكومەت لەگەڵ پارتی، بەئومێدین. بەو پێیەی لە كۆبوونەوەی جاری پێشوو كە لە ماڵی قوباد تاڵەبانی لە هەولێر ئەنجامدرا، قسەی ئەرێنی كراوە و جەخت لەوە كراوەتەوە كە نابێت چیدیكە پێكهێنانی حكومەت دوابخرێت.

ئەمەش بزانە: بەوتەی ئەو سەرچاوەیەی قسەی بۆ ئاڤا کردووە، کۆبوونەوەی ئەمجارە لە شاری سلێمانی دەكرێت، بڕیاروایە پارتی و یەكێتی لەسەر ئاستی باڵا كۆببنەوە و قسەی كۆتایی لەسەر سەرجەم پرسەكان بكەن.