ئاماری زیانەکانی لافاوەکەی دوێنێ و پێشبینی بارانبارین بۆ ئەمڕۆ

ئاڤا نیوز

دوێنی سێشەممە شەپۆلێکی تووندی بارانبارین ڕووی لە ناوچە جیاوازەکانی هەرێمی کوردستان کرد، بەهۆیەوە ئاستی ئاو بەڕێژەیەکی بەرچاو بەرزبووەوە و لە قەزای چەمچەماڵیش لافاو دروستبوو و دوو کەس گیانیان لەدەستدا و منداڵێکی دیکەش لە کەرکووک لافاو بردی و گیانی لەدەست دا، هاوکات دەیان ئۆتۆمبێل و خانوو کەوتوونەتە ژێر ئاو. هۆشداری لە دروستبوونی لافاو لە گەرمیان و هەڵەبجە دەدرێت لە چەند کاتژمێری داهاتوودا.

وێنە گەورەکە: لە 24 کاتژمێری ڕابردوودا شەپۆلێکی بەهێزی بارانبارین هەرێمی کوردستانی گرتووەتەوە و لە چەند شوێنێک بووەتە هۆی دروستبوونی لافاو بەتایبەت لە چەمچەماڵ. هاوکات  کەشناسیی کوردستان هۆشداری ئەوە دەدات لە 24 کاتژمێری داهاتوودا لە گەرمیان و پارێزگای هەڵەبجە مەترسیی دروستبوونی لافاو هەیە.

زانیاریی بەدەستهاتوو: بەگوێرەی دوایین داتای بەردەست بەهۆی لافاوەکەی دوێنێ، لەچەمچەماڵ دوو کەس گیانیان لەدەستدا و 12 کەسی دیکەش بریندار بوونە، زیانێکی زۆری ماددیش بەر هاونیشتمانیان و کاسبکاران کەوتووە.

لێدوانی فەرمی: ڕەمک ڕەمەزان، قایمقامی چەمچەماڵ بە ئاڤای گوت، "لە چەمچەماڵ زیاتر لە 500 ماڵ زیانیان بەرکەوتووە، جگە لەوەی زیان بە چەندین فەرمانگەی حکومی، بازاڕ و دووکان، ئۆتۆمبێل و کەلوپەل کەوتووە، ئەو هاونیشتمانییانەی شۆفڵ و ئامێریان هەبووە هاوکاری تیمەکانی حکومەتیان کرد، ئەگەرنا قوربانییەکان زیاتر دەبوون."

ژمارەکان وا دەڵێن:  زیانەکانی باران بارین و لافاوەکە ئەمانەن:-

سنووری پارێزگای سلێمانی:
٠ دەیان دووکان و کۆگا ئاو چووەتە ناویان.
٠ کارەبا لە قەزای چەمچەماڵ بڕاوە و هێلەکانی ئینتەرنێت کێشەیان تێکەوتووە.
٠ بنکەی کەشناسی قەزاکە زیانێکی زۆری بەرکەوتووە.
٠ لە ناحیەی پیرەمەگروون، ئاو چووەتە ناو چەندین ماڵ و کۆگا و دووکان، زیانیان بەرکەوتووە.
٠ لە قەزای دوکان حەوت ماڵ و 15 دووکان و مارکێت و ڕێستۆرانت زیانیان بەرکەوتووە.
٠  ئاو چووەتە نێو نەخۆشخانەی شەهید غەریب هەڵەدنی و بنکەی پۆلیسی فریاکەوتن

پارێزگای کەرکووک:
٠ منداڵێکی تەمەن حەوت ساڵ لە گوندی فرقانی بەهۆی بەرزبوونەوەی ئاستی خنکاوە.
٠ ئاو چووەتە ناو یەکێک لە قوتابخانەکان لە گەڕەکی شۆراو.
٠ لە ناحیەی لەیلان، گوندی بەیانلوو، یەکێک لە پردەکان ئاو بردوویەتی و لە ئێستادا ڕێگەی کەرکوک – لەیلان داخراوە.
٠ پردێکی ستراتیجی لە قەزای داقوق داڕماوە بەهۆی ئەمەش هاتووچۆی نێوان کەرکووک و بەغداد نەماوە

ئیدارەی سەربەخۆی گەرمیان:
٠ زیانێکی زۆر بەر بازاڕی قەزای ڕزگاری کەوتووە .
٠ ئاو چووتە چەندین ماڵ و زیانی ماددی بەر هاونیشتمانیان کەوتووە.
٠ ڕێگەی نێوان هەردوو قەزای کەلار و ڕزگاری پچڕاوە.
٠ هاتووچۆی نێوان گەرمیان و سەرجەم ڕێگە سەرەکییەکان داخراون، تەنیا بۆ حاڵەتی زۆر پێویست نەبێت.
٠ ئاو چووەتە ناو ژمارەیەک ماڵ  لە گەڕەکی گۆران لە کەلار.
٠ دەیان ئۆتۆمبیل ژێرئاو کەوتن و زیانیان بەرکەوتووە.
٠ بەشێکی پرۆژەی ئاودێری سەلام، کە شادەماری ژیانی گەرمیانە، ئەو بەشەی لە هەوارە سوورەیە بەتەواوەتی ئاو بردوویەتی.
٠ پرۆژەی شێخ لەنگەر زیانێکی زۆری بەرکەوتووە.
٠ بەشێک لە ڕێگەوبانەکانی گەرمیان زیانیان بەرکەوتووە.
٠ زیانێکی زۆر بەر تۆڕی کارەبا کەوتووە

لەلایەکی دیکەوە: دیلان ڕەشاد، وتەبێژی وەزارەتی گواستنەوە و گەیاندن، هۆشداری دەدات دەربارەی ئاستی دابارینی زۆر لە چەند ناوچەیەکی هەرێمی کوردستان، جەخت لەوە دەکاتەوە کە بەپێی پێشبینییەکان لە چەمچەماڵ و سنووری ئیدارەی گەرمیان و ناوچە شاخاوییەکان و قەزا و ناحیەکانی نزیک سنوورەکان، ئاستی دابارین زیاتر دەبێت.