سوودانی و کۆمپانیایەکی ئەمریکی  تاوتوێی دابینکردنی ئینتەرنێتی خێرا دەکەن

ئاڤا نیوز

سەرۆکوەزیرانی کاربەڕێکەری عێراق لەگەڵ شاندێکی کۆمپانیای "سپەیس ئێکس (ستارلینک)"ـی ئەمریکی کۆبووەوە بۆ گفتوگۆکردن لەبارەی قۆناغەکانی کۆتایی پێدانی مۆڵەتی دابینکردنی ئینتەرنێتی خێرا.

چیرۆکی سەرەکی: ئەمڕۆ پێنجشەممە 11ی کانوونی یەکەمی 2025، محەممەد شیاع سوودانی بە ئامادەبوونی جۆشوا هاریس، کاربەڕێکەری باڵیۆزخانەی ئەمریکا لە عێراق، پێشوازی لە شاندێکی کۆمپانیای تەکنەلۆژیای سپەیس ئێکس کرد.

لە دیدارەکەدا گفتوگۆ لەبارەی قۆناغەکانی کۆتایی پێدانی مۆڵەتی کارکردن بە کۆمپانیاکە کرا، هاوکات باس لە چۆنیەتی پتەوکردنی هەماهەنگی لە بواری پەیوەندییەکان، سروشتی خزمەتگوزارییەکان و ئەو ناوچانە کرا کە تۆڕەکە دەیانگرێتەوە.

لێدوان فەرمی:  محەممەد شیاع سوودانی لە میانەی کۆبوونەوەکەدا رایگەیاند: "عێراق هەنگاوی گرنگی بڕیوە لە راکێشانی کۆمپانیا جیهانییەکان و دابینکردنی پێداویستییەکانیان تا لێرە کاربکەن، بەتایبەت سیستەمەکانی ئینتەرنێت".

هەروەها سوودانی گوتی: "حکومەت سورە لەسەر برەودان بە تەکنەلۆژیای زانیاری و گۆڕانی دیجیتاڵی لەڕێگەی هاوکاریکردن لەگەڵ سپەیس ئێکس بۆ هاتنە ناو بازاڕی عێراقەوە، کە ئەمڕۆ دەرفەتی وەبەرهێنانی زۆری تێدایە".

لەهەمان كاتدا: سوودانی جەختیکردەوە کە کارکردن لە کەرتی پەیوەندییەکان دەبێت لەسەر بنەمای "پاراستنی سەروەریی زانیاری و تەکنەلۆژیای عێراق" بێت.