لە سەنتەری حاجی ئۆمەران پێنج سانتیمەتر بەفر باریوە

ئاڤا نیوز

 

لە سەنتەری ناحیەی حاجی ئۆمەران پێنج سانتیمەتر بەفر باریوە و بەفر بارینیش بەردەوامە، تیمەکانی پاراستن و چاککردنەوەی ڕێگاوبانیش بەردەوامن لە خاوێن کردنەوەی شەقامەکان.

 

چیرۆکی سەرەکی: وەک ئەوەی پێشبینی دەکرا، شەپۆلێکی بەفربارین لە شەوی ڕابردووەوە هەرێمی کوردستانی گرتووەتەوە، لە هەندێ ناوچە نمەباران باریوە، لە بەشێک ناوچە شاخاوییە سنوورییەکانیش بەفر باریوە.

 

لێدوانی فەرمی: عەبدولوەهاب مەحموود، بەڕێوەبەری ناحیەی حاجی ئۆمەران بە ئاڤا میدیای گوت: لە سەنتەری ناحیەی حاجی ئۆمەران پێنج سانتیمەتر بەفر باریوە، بەفر بارینیش بەردەوامە، بەڵام هاتووچۆی هاونیشتمانیان و جموجۆڵی بازرگانی ئاساییە.

 

- تیمێکمان هەیە کە سەر بە بەڕێوەبەرایەتیی چاککردنەوە و پاراستنی ڕێگاوبانی سۆرانە، ئەم تیمە تایبەتە بە پاککردنەوەی ڕێگاوبانەکانی سنووری حاجی ئۆمەران، هەر کاتێک بەفر ببارێت تیمەکە لە ئەرکدا دەبێت و ڕێگاکان خاوێن دەکاتەوە، نزیکەی چوار ساڵە نەمانهێشتووە بەهیچ جۆرێک ڕێگای حاجی ئۆمەران دابخرێت.

 

لە لایەکی دیکەوە: هاوار عەباس، پەیامنێری ئاڤا میدیا گوتی، لایەنە پەیوەندیدارەکان ئامادەکاریی تەواویان کردووە بۆ پێشوازی لە گەشتیاران، بۆ ئەم مەبەستەش ڕێکاری پێویست گیراوەتەبەر و پلانی ئەنجامدانی ژمارەیەک چالاکیی جیاواز تایبەت بە گەشتیاریی زستانە دانراون و لە سنووری قەزای چۆمان و ناحیەی حاجی ئۆمەران جێبەجێ دەکرێن.