لە پێنج ڕۆژدا سێ درۆن لە تورکیا کەوتوونەتە خوارەوە؛ نازانرێت هی چ وڵاتێکن

ئاڤا نیوز

 

درۆنێکی دیکە لە ناوچەیەکی چۆڵ لە قەزای مانیاس لە سنووری باڵکئەسیر لە ڕۆژئاوای تورکیا کەوتە خوارەوە و هێشتا نەزانراوە هی چ وڵاتێکە.

 

چیرۆکی سەرەکی: لە پێنج ڕۆژدا سێ درۆن لە وڵاتانی دیکەوە دێن و ئاسمانی تورکیا دەبەزێنن و لە قوڵایی خاکی وڵاتەكە دەکەونە خوارەوە.

 

بڵاوکراوەی فەرمی: میدیاکانی تورکیا بڵاویان کردووەتەوە درۆنەکەی ئەمڕۆ لەلایەن جووتیارانی ناوچەکەوە دۆزراوەتەوە و هێزە ئەمنییەکانی لێ ئاگادار کراوەتەوە. 

بە ڕەچاوکردنی ڕێوشوێنی ئەمنی و بۆ ئەنجامدانی لیکۆڵینەوەی تەکنیکیی ورد، تیمە پەیوەندیدارەکان درۆنەکەیان بۆ ئەنقەرە ڕەوانە کرد.

 

ئەوەی پێویستە بیزانیت: ئەم ڕووداوە لە کاتێکدایە، دوێنێ درۆنێکی جۆری (Orlan-10) ڕووسی لە قەزای ئیزمیت لە پارێزگای کۆجائەلی کەوتە خوارەوە. 15ی مانگیش درۆنێک بە ئاسمانی دەریای ڕەشدا هات، ئاسمانی تورکیای بەزاند و لەلایەن فڕۆکەی ئێف-16ەوە لە ئەنقەرە'ی پایتەخت خرایە خوارەوە.