پۆلیسی هەولێر لەبارەی ڕفاندنی کادیرەکەی یەکێتی: ڕاستییەکان دەردەخەین

ئاڤا نیوز

 

بەڕێوەبەرایەتیی پۆلیسی هەولێر لەبارەی ڕفاندنی کادیرەکەی یەکێتی دەڵێت، لە بوونی سکاڵای یاسایی ڕێوشوێنی لێکۆڵینەوە و ڕێکاری پێویست بۆ دەرخستنی ڕاستی و سەروەری یاسا دەگرینەبەر.

 

ڕاگەیێنراوی فەرمی: ڕۆژی یەکشەممە 21-12-2025، بەڕێوەبەرایەتیی پۆلیسی هەولێر ڕایگەیاند، هاووڵاتی (میران بەکر عەبدولڕەحمان)، کە کارمەندی وەزارەتی پێشمەرگەیە و پێشتر سکرتێری ڕۆژنامەوانیی وەزیری پێشمەرگە بووە و کادری یەکێتییە، شەوی 19ی ئەم مانگە لە سنووری بارەگای مەکتەبی سیاسیی حزبەکەی، لەلایەن چەند چەکدارێکی خۆیانەوە دەستگیر کراوە. پۆلیسی هەولێر دەڵێت دوای ماوەیەک لە دەستگیرکردنی، میران بەکر ئازاد کراوە.

 

- پۆلیسی هەولێر دەڵێت: لە بوونی سکاڵای یاسایی، پۆلیس و لایەنە پەیوەندیدارەکان ڕێوشوێنی لێکۆڵینەوە و ڕێکاری پێویست بۆ دەرستنی ڕاستی و سەروەری یاسا  و یەکلایکردنەوەی كێشەکان دەگرینەبەر.

 

لەلایەکی دیکەوە: پۆلیسی هەولێر دڵنیایی دەداتە هاووڵاتیان "بە هیچ جۆرێک ڕێگە بە هیچ کەس و لایەنێک نادەن، کە هەوڵی تێکدانی ئارامی و ئاسایش بدات و ئازادی کەسی و کەرامەتی هاووڵاتیان لە ژێر هیچ بیانوویەک پێشێل بکات.

 

باکگراوند: پێشتر میران بەکر ڕایگەیاندبوو: شەوی 19 لەسەر 20ی12ی 2025، لە نزیك بارەگای مەكتەبی سیاسیی یەكێتی لە شاری هەولێر، چەند چەكدارێك دەیڕفێنن و دوای سێ كاتژمێر لە ئەشكەنجەدان ئازادی دەكەن. بەپێی گوتەی خۆی، چەكدارەكان سەر بە هێزێكی ئەمنیی مەكتەبی سیاسیی یەكێتی بوون.