قایمقامی نوێی چەمچەماڵ: بۆ پیرۆزبایی کەس چەپکە گوڵم بۆ نەهێنێت

ئاڤا نیوز

ئەمڕۆ یەکشەممە، ئاسۆ بەکر، وەک قایمقامی نوێی چەمچەماڵ دەستبەکار بوو، لە کۆنگرەیەکی ڕۆژنامەنووسی ڕایگەیاند، کەس لە قایمقامییەت بۆ پیرۆزبایی سەردانی نەکات.

چیرۆکی سەرەکی: ڕۆژی 9-12-2025، لافاوێکی بەهێز سەنتەری قەزای چەمچەماڵ و ناحیەکانی شۆڕش و تەکیەی گرتەوە زیاتر لە هەزار ماڵ زیانیان بەرکەوت و سێ کەسیش گیانیان لەدەستدا. دواتر لیژنەیەکی لێکۆڵینەوە پێکهات و ژمارەیەک بەرپرسی کارگێڕی لە پۆستەکانیان بەخشران.

لێدوانە فەرمییەکان:

٠ عەتا محەممەد، سەرۆکی کۆمسیۆنی بووژانەوەی چەمچەماڵ ڕایگەیاند، لە سبەی دووشەممەوە دەست بە دابەشکردنی هاوکاری بەسەر زیانلێکەوتوان دەکرێت. داوا لەو خەڵکە دەکرێت کە ناوی تۆمار کراوە مۆبایلیان داخراو نەبێت و کراوەبێت، سەرەتا ماڵەکان قەرەبوو دەکرێنەوە دواتر دووکان و ئۆتۆمبێل.

عەتا محەممەد وتیشی، حاکم ئەنوەر، سەرۆکی دەستەی دەستپاکی سەرۆکایەتی دابەشکردنی هاوکارییەکان دەکات. هەوڵ دەدرێت بەشێوەیەکی دادپەروەرانە دابەش بکرێت.

٠ ڕەمک ڕەمەزان، قایمقامی پێشووی چەمچەماڵ لە کۆنگرەیەکی ڕۆژنامەنووسی وتی، لەماوەی ڕابردوو  17 فەرمانگەمان دامەزراند، لە بواری کارەبا و ڕێگاوبان هەنگاوی باشمان نا. سوپاسی خەڵکی ناوچەکە دەکەم و داوای لێبوردنیش لەوانە دەکەم کە نەمانتوانی خزمەتی زیاتر بکەین لەبەر سنووردار بوونی دەسەڵاتی دارایی و ئیداری.

٠ ئاسۆ بەکر، کە پێشووتر قایمقامی قەزای ناوەندی سلێمانی بووە، وەک قایمقامی نوێی چەمچەماڵ دەستبەکار بوو ڕایگەیاند، لە ئەمڕۆوە دەچنە ناو خەڵک و بۆ پیرۆزبایی کەس لە دیوانی قایمقامیەت سەردانیان نەکات و چەپکە گوڵیان بۆ نەهێنێت.