شانەیەکی داعش لە گوندەکانی دیمەشق لەناو دەبرێت

ئاڤا نیوز

ئاسایشی سووریا ڕایدەگەیێنێت، ئۆپەراسیۆنێکی ئەمنییان لە گوندەکانی دیمەشق ئەنجامداوە، کە پێگەیەکی ڕێکخراوی تیرۆریستیی داعشی کردووەتە ئامانج و بووە هۆی دەستگیرکردنی سەرکردەیەک و 6 ئەندامی شانەکە، لەگەڵ دەستبەسەرداگرتنی چەک و تەقەمەنی.

وێنە گەورەکە: حکومەتی کاتیی سووریا پابەندبوونی خۆی بە بەرەنگاربوونەوەی داعش لە چوارچێوەی هاوپەیمانی نێودەوڵەتی دژی داعش دووپات کردووەتەوە، بە تایبەت ئێستا جموجۆڵەکانی داعش لە ناوچە جیاوازەکانی سووریا زیادیکردووە و لە ماوەی ڕابردوودا توانیان زیان بە هێزەکانی ئەمریکا بگەیێنن.

بڵاوکراوەی فەرمی: ئاژانسی هەواڵی سووریا لەسەر زاری عەمید ئەحمەد دالاتی، فەرماندەی ئاسایشی ناوخۆ لە گوندەکانی دیمەشق، ئاشکرای کرد، ئۆپەراسیۆنەکە بە هاوکاری دەزگای هەواڵگریی گشتی ئەنجامدراوە.

ئەوەی ئێستا ڕوودەدات: بە گوتەی دالاتی، ئۆپەراسیۆنەکە بە تەواوی شانە تیرۆریستییەکەی تێکشکاند و توانرا سەرکردەی شانەکە و شەش ئەندامی داعش دەستگیر بکرێن.

باکگراوند: ڕۆژی 12-11-2025، باڵیۆزخانەی ئەمریکا لە سووریا، بە فەرمی بەشداری سووریای لە چوارچێوەی هاوپەیمانی نێودەوڵەتی دژی داعش ڕاگەیاند.