سەرچاوەیەکی ئەمریکی: ئەمشەو ئێران بە 100 درۆن هێرش دەکاتە سەر ئیسرائیل

ئاڤا نیوز 

ئێران 100 مووشەکی ئامادەکردووە، بۆ تۆڵەکردنەوەی هێرشەکەی ئیسرائیل كە لە دیمەشق كردییە سەر باڵیۆزخانەی ئێران و چەند فەرماندە و دیپلۆماتكارێكی كوشت. 

وێنە گەورەکە: دوو بەرپرسی ئەمریکی بۆ کەناڵی "سی بی ئێس نیوز" یان ئاشكراكردووە، چاوەڕوان دەکرێت  شەوی هەینی ئێران هێرشێکی گەورە بۆ سەر ئیسرائیل بکات، زیاتر لە 100 فڕۆکەی بێفڕۆکەوان و دەیان مووشەک ئامادەکراون بۆ ئەوەی  پێگە سەربازییەکانی ناوخۆی ئیسرائیل بکەنە ئامانج.

لە لایەکی دیکەوە: میدیاکانی نزیک لە حیزبووڵڵای لوبنان دەڵێن: ئەمشەو وەڵامی هێرشەکەی ئیسرائیل دەدەینەوە.

ئەوەی پێویستە بیزانیت: ڕۆژی پێنجشەممە، وەزارەتی دەرەوەی ئەمریکا هۆشداری بە ئەمریکییەکانی نیشتەجێی ئیسرائیل دا،  گەشت بۆ دەرەوەی شارە گەورەکان نەکەن، تائێستاش فەڕەنسا و ڕووسیا هاووڵاتییانیان ئاگادار كردووەتەوە گەشت بۆ ڕۆژهەڵاتی ناوەڕاست نەكەن.

بۆ چوونی لایەنی بەرامبەر: دوێنی پێنجشەممە بنیامین نەتانیاهۆ، سەرۆکوەزیرانی ئیسرائیل، لەکاتی سەردانی هێزەکانی لە بنکەیەکی ئاسمانی ئیسرائیل،  گوتی "هەرکەسێک زیانمان پێبگەیەنێت، زیانی پێدەگەیێنینەوە"، "ئێمە ئامادەین چ لە ڕووی بەرگری و چ لە ڕووی هێرشبردنەوە."

باكگراوند: دوو شەممەی ڕابردوو ئیسرائیل باڵیۆزخانەی ئێرانی لە دیمەشق بۆردوومانکرد، حەوت بەرپرس و  ڕاوێژکاری ئێرانی کوشت.