کۆتایی سەردەمی سۆسیالیستەکان لە ڤەنزوێلا

ئاڤا نیوز

دۆناڵد ترەمپ، سەرۆکی ئەمریکا، ڕایگەیاند هێزەکانی وڵاتەکەی لە ئۆپراسیۆنێکی سەربازیی کتوپڕدا "نیکۆلاس مادۆرۆ"، ڕێبەری ڤەنزوێلا و "سیلیا فلۆرێس"ی هاوسەرییان دەستگیرکردووە و بۆ شوێنێکی نادیار لە دەرەوەی وڵات گوازراونەتەوە.

وێنە گەورەکە: ئەم ئۆپراسیۆنە گەورەترین دەستوەردانی سەربازیی ئەمریکایە لە ئەمریکای لاتین لە چەند دەیەی ڕابردوودا. واشنتن دەیەوێت بە لادانی مادۆرۆ، کۆتایی بە ڕژێمێک بهێنێت کە ساڵانێکە بە تۆمەتی قاچاخچێتی ماددەی هۆشبەر، هەناردەکردنی "تیرۆری کۆچبەران" و تێکدانی ئاسایشی نیشتمانیی ئەمریکا تۆمەتباری دەکات.

بۆچی گرنگە: ڤەنزوێلا گەورەترین یەدەگی نەوتی سەلمێندراوی جیهانی هەیە (17%ی کۆی جیهان)، بەڵام بەهۆی مادۆرۆوە ئێستا تەنیا 0.8%ی نەوتی جیهان بەرهەم دەهێنێت. ترەمپ بەم هەنگاوە دەیەوێت سێ ئامانج بپێکێت:

- کۆچبەری: ڕاگرتنی لێشاوی 8 ملیۆن کۆچبەری ڤەنزوێلی.

- ماددەی هۆشبەر: بڕینی ڕێگەی "فینتانیل و کۆکایین" کە ترەمپ وەک چەکی کۆکوژ ناویان دەبات.

- نەوت: دوورخستنەوەی هەژموونی چین و ئێران لەسەر کێڵگە نەوتییەکانی ڤەنزوێلا.

چیرۆکی سەرەکی: بەرەبەیانی ئەمرۆ شەممە بە فەرمانی دۆناڵد ترەمپ، یەکەی دژە تیرۆری سوپای ئەمریکا (Delta Force) ئۆپراسیۆنێکی تایبەتی بە چڕی و لە چەندین قۆڵەوە ئەنجامدا، بەهۆیەوە بنکە سەربازییەکانی کاراکاسی پایتەخت، میراندا، لا گوایرا و ئاراگوا بۆردومان کران، دواتر مادۆرۆ و خێزانەکەی لە ژووری نووستنەکەی دەستگیرکران. 

ئەوەی پێویستە بیزانیت: مادۆرۆ کە پێشتر شۆفێری پاس بوو، لە ساڵی 2013ـەوە وەک جێگرەوەی هۆگۆ چاڤێز دەسەڵاتی گرتە دەست. گومانەکانی سەر هەڵبژاردنی 2024 و دوورخستنەوەی "ماریا کۆرینا ماچادۆ" (خاوەنی خەڵاتی نۆبڵی ئاشتی)، شەرعییەتی نێودەوڵەتیی مادۆرۆی بە تەواوی لەناوبرد و ڕێگەی بۆ ترەمپ خۆش کرد تاوەکو پەنا بۆ بژاردەی سەربازی ببات.

ئەوەی ئێستا ڕوودەدات: دۆخی ناوخۆی ڤەنزوێلا شڵەژاوە؛ جێگری سەرۆک دەڵێت نازانێت مادۆرۆ زیندووە یان نا، ئەمەش نیشانەی ڕووخانی فەرمیی دەسەڵاتی مادۆرۆیە. ترەمپ گرووپە تاوانکارییەکانی وەک "ترێن دی ئاراگوا"ی وەک ڕێکخراوی تیرۆریستی ناساندووە و مادۆرۆ بە سەرکردەی ئەو گرووپانە دەزانێت کە "ژەهری فینتانیل" دەهێننە ناو ئەمریکا.