ئاڤای خەڵک؛ بەهۆی ڕووخانی پردێک لە سنووری چەمچەماڵ هاتووچۆی 10 گوند پەکی کەوتووە

ئاڤا نیوز

بەهۆی لافاوەکانی ئەم دواییەی چەمچەماڵ، شۆڕش و تەکیە، پردی "چەمی زەرزی" لە ناوچەی چەمی ڕێزان بەتەواوی ڕووخاوە؛ ئەمەش بووەتە هۆی پچڕانی ڕێگەی سەرەکیی زیاتر لە 10 گوند و پەککەوتنی هاتووچۆی هاونیشتمانییان.

چیرۆکی سەرەکی: ئەم پردە تەنیا ڕێگەی گوندەکان نییە، بەڵکو یەکێکە لە پردە ستراتیژییەکانی پارێزگای سلێمانی کە هەریەک لە (چەمچەماڵ، شۆڕش، تەکیە و بازیان) بە قەزای دووکان و ناوچەکانی (سوورداش، ڕانیە و قەڵادزێ) دەبەستێتەوە، ئەمەش گرفتی گەورەی بۆ هاتووچۆی ژمارەیەکی زۆر لە هاونیشتمانیان دروست کردووە.

بەدواداچوونی ئاڤا: ڕێبوار هادی، دانیشتووی یەکێک لە گوندەکانی ناوچەکەیە، ئەو بەهۆی ڕووخانی پردەکەوە وازی لە کارەکەی هێناوە؛ ئێستا ڕۆژانە منداڵانی گوندەکەی خۆی و دەوروبەر کۆ دەکاتەوە و بەپێ دەیانباتە ئەو دیوی پردە ڕووخاوەکە تاوەکو بگەنە قوتابخانەکەیان لە چەمی ڕێزان، لەوێش چاوەڕێیان دەکات تاوەکو دەوام تەواو دەکەن و دەیانگەڕێنێتەوە.

زانیاریی زیاتر: هاونیشتمانییان پردێکی سەرەتایییان لە دار و بەرد دروست کردووە کە تەنیا بۆ پیادە دەبێت، ئێستا خەڵکی ناوچەکە بڕی 4,700 دۆلار (47 وەرەقە)یان کۆکردووەتەوە بۆ چاککردنەوەی پردەکە، بەڵام بەهۆی نەبوونی ئامێری قورس و کەلوپەلی پێویست، نەیانتوانیوە کارەکە تەواو بکەن.

لێدوانی فەرمی: دەرباز قادر، بەڕێوەبەری ناحیەی سوورداش بە ئاڤای ڕاگەیاند: "لە هەوڵی جیددیداین سەرەتا پردێکی جێگرەوە دروست بکەین تاوەکو ژیان ئاسایی بێتەوە، دواتریش بە زووترین کات پردێکی نوێ بە کوالێتیی بەرز بنیات دەنێین."