ئاڤای خەڵک؛ سێ ساڵە پڕۆژەی ئاوی سێ گوند تەواو نەکراوە و مەترسیی چۆڵبوونیان لەسەرە

ئاڤا نیوز

دانیشتووانی گوندەکانی (ئۆمەراوە، ڕەزان و گوێزان) لە ناحیەی گەڵاڵە، ماوەی سێ ساڵە چاوەڕوانی تەواوکردنی پڕۆژەی ئاوی گوندەکانیان دەکەن؛ بەهۆی کەمئاوییەوە دۆخی ژیانیان قورس بووە.

چیرۆکی سەرەکی: ئەو  سێ گوندەی سنووری قەزای چۆمان پڕۆژەی ئاویان بۆ دەرچووە، بەڵام هەمووی دراوە بە یەک بەڵێندەر، ماوەی سێ ساڵە پڕۆژەکان دەستیان پێ کراوە و تاوەکو ئێستا تەواو نەکراون، دانیشتووانی ناوچەکە دەڵێن ئەگەر ئاویان بۆ دابین نەکرێت، ناچار دەبن گوندەکان چۆڵ بکەن.

بەدواداچوونی ئاڤا: سەعدی حەسەن، دانیشتووی گوندی ئۆمەراوە بە ئاڤای ڕاگەیاند، تەنیا لە گوندەکەی ئەوان بەهۆی کەمئاوییەوە 15 ماڵ گوندیان چۆڵ کردووە و ئێستا تەنیا 37 ماڵ ماونەتەوە. دەشڵێت: "پڕۆژەکەمان نزیکەی تەواو بووە و تەنیا کردنەوەی قوفڵەکەی ماوە، نازانین بۆچی ڕایانگرتووە."

لێدوانی فەرمی: محەممەد مەحموود، بەڕێوەبەری ناحیەی گەڵاڵە بە ئاڤای ڕاگەیاند: پڕۆژەکان 60%ی کارەکانیان تەواو بووە و بەهۆی نەبوونی پارەوە ڕاوەستاون، نووسراو بۆ ئیدارەی سۆران کراوە و خۆشبەختانە پارەکە کراوە بە چەک، تەنیا خەرجکردنی ماوە تاوەکو بەڵێندەرەکە دەستبەکار بێتەوە.