موقتەدا سەدر لە خودا دەپاڕێتەوە برا کورد و تەواوی پێکهاتەکان لە سووریا بپارێزێت

ئاڤا نیوز

 

موقتەدا سەدر، ڕێبەری ڕەوتی سەدر پەیامێكی بڵاوكردەوە كە تیایدا داوا لە خودا دەكات سەرجەم پێكهاتەكانی سووریا، وەكو كورد، كریستیان، سوننە، دروز، شیعە و پێكهاتەكانی دیكە لە ئاگری شەڕ بپارێزێت.

 

وێنە گەورەكە: ئەمڕۆ سێیەم ڕۆژی هێرشی چەكدارانی سەر بە سوپای سووریایە بۆ گەڕەكە كوردییەکان لە شاری حەلەب، بە هۆیەوە دەیان هەزار كەس ئاوارە بوون، جگە لەوەی ژمارەیەكی زۆر خەڵكی مەدەنی شەهید و بریندار بوون، بەڵام وڵاتانی دونیا هیچ هەڵوێستێكی كردەییان نەبووە بۆ ڕاگرتنی ئەو دەستدرێژییانە.

 

لێدوانی فەرمی: موقتەدا سەدر، لە ئەژماری فەرمی خۆی لە تۆڕی كۆمەڵایەتی ئێكس، نوسیویەتی: بەناوی خودا، خودایە سووریا بپارێزە، خودایە گەلەكەمان بە هەموو پێكهاتەكانیەوە بپارێزە: سوننەكان، شیعەكان، درووزەكان، كوردەكان، مەسیحییەكان و هەموو پێكهاتە لە هەموو جەنگ و توندوتیژی و ئازار چەشتنێك، بۆ خاتری محەممەد (د.خ) و یاوەرانی.

 

زانیاری زیاتر: لە عێراقدا جگە لە موقتەدا سەدر، چەند بەرپرسێكی باڵای وەكو د. فوئاد حسێن، وەزیری دەرەوە و حكومەتی عێراق، كە داوای چارەسەركردنی ناكۆكییەكانیان كردبوو بە ئاشتیانە، زۆر كەمن ئەو بەرپرس و كەسایەتییانەی هاوسۆزیی خۆیان بۆ خەڵكی كوردستان دەرببڕن.

 

لەلایەكی دیكەوە: پەیامەكەی موقتەدا سەدر بۆ هاوسۆزی كورد لە سوریا لەكاتێكدایە كە دۆخی مرۆیی لە ناو شێخ مەقسوود و ئەشرەفییە گەیشتووەتە ئاستێكی مەترسیدار؛ كارەبا بە تەواوی بڕاوە و ڕێگری لە چوونە ژوورەوەی خۆراك، دەرمان و سووتەمەنی دەكرێت. لە بەرامبەریشدا، میدیای فەرمیی سووریا (سانا) باس لە گەیاندنی دەیان بریندار بۆ نەخۆشخانەكانی حەلەب و عەفرین دەكات بەهۆی بۆردومانەوە.

 

باكگراوند: گەڕەكەكانی شێخ مەقسوود و ئەشرەفییە لە حەلەب، ماوەیەكی زۆرە لەژێر گەمارۆ و فشاری بەردەوامی هێزەكانی سەر بە حكومەتی سووریادان. لە چەند ڕۆژی ڕابردوودا، هێرشەكان بە تانك و زرێپۆش چڕتر بوونەتەوە، بەڵام بەرەی بەرگریی ناوخۆیی ئاماژە بەوە دەدەن كە ئامادەن بۆ شەڕێكی درێژخایەن و هیچ پلانێكیان بۆ كشانەوە بەرەو ناوچەكانی دیكە نییە.