خواردن و هاوكاریی تەندروستی بە ئاوارەكانی گەڕەکە کوردییەکانی حەلەب گەیێنرا

ئاڤا نیوز

تيمەکانی دەزگای خێرخوازیی بارزانی لە نووسینگەی عەفرین، خواردن و هاوکاری سەرەتایی و خزمەتگوزاریی تەندروستی پێشکەش بە دانیشتووانی ئاوارەبووی ئەشرەفیە و شێخ مەقسوود كرد كە ئێستا ڕوویان لە عەفرین كردووە.

وێنە گەورەکە: پەرەسەندنی گرژییەکانی حەلەب لە چوار ڕۆژی ڕابردوودا، ناوچەکەی بەرەو "کارەساتێکی مرۆیی" بردووە. تێکەڵبوونی شەڕی تانک و بۆردوومان لەگەڵ سەرمای زستانی ناوچەکە، ژیانی هەزاران ژن و منداڵی خستووەتە مەترسییەوە. 

عەفرین ئێستا وەک "پەناگەی سەرەکی" بۆ ئاوارەی گەڕەکە کوردییەکان دەبینرێت و نووسینگەی عەفرینی دەزگای خێرخوازیی بارزانی هەڵمەتێكی فراوانی كۆمەككردنی ئاوارەكانی گەڕەكە كوردنشینەكانی حەلەبی دەستپێكردووە كە ڕوویان لەو ناوچەیە كردووە.

لێدوانی فەرمی: مووسا ئەحمەد، سەرۆکی دەزگای خێرخوازیی بارزانی بە ئاڤای ڕاگەیاند: لە ئەمڕۆ هەینییەوە دەست دەکەین بە دابەشکردنی خواردنی گەرم و ئامادە بەسەر ئاوارەکانی ئەشرەفییە و شێخ مەقسوود. هاوكات تیمە تەندروستییەکانمان ڕاسپێردراون بۆ چاودێریکردنی دۆخی تەندروستیی ئاوارەکان، چونکە سەرما و سۆڵە دۆخەکەی دژوارتر کردووە.

چی ڕوودەدات: بەپێی ئامارە نافەرمییەكان نزیكەی 30 هەزار خانەوادەی گەڕەكە كوردنشینەكانی حەلەب، ئاوارەی عەفرین بوونە، ئێستا دەزگای خێرخوازیی بارزانی دەستیكردووە بە هاوكاریكردنیان.