سەرۆكی مانگی سووری كوردی: ڕێگری لە گەیاندنی هاوكاریی تەندروستی بۆ نەخۆشخانەكانی ئەشرەفییە دەكرێت

ئاڤا نیوز

بەهۆی بەردەوامی بۆردوومانی سوپای عەرەبی سووریا بۆسەر گەڕەكەكانی شێخ مەقسوود و ئەشرەفییە، تیمە تەندروستییەكانی مانگی سووری كوردی ناتوانن بگەنە نەخۆشخانەكانی ئەو ناوچەیە، ئەوەش لەكاتێكدایە ژمارەیەكی زۆری بریندار لەنێو هەردوو نەخۆشخانەی خالید فەجر و سوان لە ئەشرەفییە گیریانخواردووە و خزمەتگوزاریی تەندروستی وەستاوە.

چیرۆکی سەرەکی: ئێوارەی ئەمڕۆ هێزەکانی سوپای عەرەبی سووریا بۆردوومانی نەخۆشخانەی خالید فەجریان کرد، بەهۆیەوە بەشێکی نەخۆشخانەکە ئاگری گرت و ژمارەیەک کارمەند شەهید و بریندار بوون.

لێدوانی فەرمی: د. دڵگەش عیسا، سەرۆكی مانگی سووری كوردی تایبەت بە ئاڤا ڕایگەیاند، دۆخێكی كارەساتبار باڵی بەسەر هەردوو گەڕەكی شێخ مەقسوود و ئەشرەفییە كێشاوە، خزمەتگوزاریی تەندروستیش لە نەخۆشخانەكانی ئەشرەفییە وەستاوە.

سەرۆكی مانگی سووری كورد وتیشی، بەهۆی بەردەوامی بۆردوومانكردن ژمارەیەكی زۆری بریندار لە هەردوو نەخۆشخانەی خالید فەجر و سوان بەبێ دەرمان و پێداویستی پزیشكی گیریانخواردووە و تیمەكانمان ناتوانن بە نەخۆشخانەكان بگەن، ئەوەش لەكاتێكدا دۆخی بەشێك لە بریندارەكان نالەبارە و پێویستییان بە دەرمان و بەدەنگەوەهاتنی خێرا هەیە.