ئیلهام ئەحمەد: ئامادەین هیزەكانمان لە شێخ مەقسوود و ئەشرەفییە بگوازینەوە و مەرجمان هەیە

ئاڤا نیوز

 

بەڕێوەبەرایەتیی خۆسەر ئامادەیی خۆی نیشاندا بۆ گواستنەوەی هێزەكانیان لە شێخ مەقسوود و ئەشرەفییە بۆ ڕۆژهەڵاتی فۆرات، بەمەرجی ئەوەی بەپێی ڕێككەوتننامەی یەكی نیسان، پاراستنی ناوخۆیی و ئەنجوومەنی خۆجێی بۆ دانیشتووانەكە مسۆگەر بكرێت.

 

لێدوانی فەرمی: ئیلهام ئەحمەد، بەرپرسی پەیوەندییەكانی دەرەوەی بەڕێوەبەرایەتیی خۆسەری باكوور و ڕۆژهەڵاتی سووریا، لە تۆڕی كۆمەڵایەتیی ئێكس ڕایگەیاندووە، پێشوازی لە دەستپێشخەریی هێزە نێودەوڵەتییەكان دەكەین بۆ گواستنەوەی هێزەكانیان بۆ ڕۆژهەڵاتی فورات، لەبەر ئەوەی پاراستنی گیانی هاووڵاتییانی مەدەنی لە هەردوو گەڕەكی شێخ مەقسوود و ئەشرەفییە لەپێشینەی كارەكانمانە.

 

مەرجی سەرەكی: سەبارەت بە مەرجەكانی ئەم گواستنەوەیە، ئیلهام ئەحمەد ئاماژەی بەوە داوە كە ڕەزامەندییان مەرجدارە بەوەی: دەبێت گرەنتی هەبوونی پاراستنی كوردیی ناوخۆیی و مانەوەی ئەنجوومەنی خۆجێیی بۆ دانیشتووانی هەردوو گەڕەكەكە بكرێت، ئەوەش بەپێی بەندەكانی ڕێككەوتننامەی یەكی نیسان.

 

ئەم لێدوانەی بەرپرسەكەی بەڕێوەبەرایەتیی خۆسەر لە كاتێكدایە كە گفتوگۆی نێودەوڵەتی بۆ هێوركردنەوەی دۆخی حەلەب و پاراستنی دانیشتووانی كورد لەو ناوچەیە بەردەوامی هەیە.

 

باكگراوند: بەهۆی هێڕشی چەكدارەكانی سەر بە سوپای سووریا بۆسەر گەڕەكە كوردنشینەكانی شاری حەلەب، هێزەكانی سووریای دیموكرات (هەسەدە) ڕایانگەیاندووە دەیان كەس شەهید بوون و نزیكەی 150ـی دیكە بریندارن. هاوكات مانگی سوور ئاماری 13 شەهید و 100 برینداری پشتڕاست كردووەتەوە.