تۆم باراک: پێویستە دەستبەجێ ڕێککەوتننامەی 10ی ئازاری 2025 لە سووریا جێبەجێ بکرێت

ئاڤا نیوز

ئەیمەن سەفادی، وەزیری دەرەوەی ئوردن و تۆم باراک، نێردەی تایبەتی سەرۆک ترەمپ بۆ سووریا، لە پەیوەندییەکی تەلەفۆنیدا دوایین پێشهاتەکانی سووریایان تاوتوێ کرد؛ هەردوولا جەختیان لەسەر چەسپاندنی ئاگربەست و پاراستنی سەروەریی وڵاتەکە کردەوە.

وێنە گەورەکە: واشنتن و عەممان دەیانەوێت ڕێگری لە داڕمانی ئەو لێکتێگەیشتنە سیاسییانە بگرن کە لە ساڵی ڕابردووەوە لە سووریا دروست بوون. پشتیوانیکردنی سەروەریی حکومەتی سووریا و هاوکات پاراستنی ماف و سەلامەتیی پێکهاتەکان، وەک تاقە ڕێگە بۆ ڕێگریکردن لە هەڵگیرسانەوەی شەڕێکی گشتگیری ناوخۆیی دەبینن.

چیرۆکی سەرەکی: ڕۆژی شەممە وەزیری دەرەوەی ئوردن و تۆم باراک، نێردەی تایبەتی سەرۆک ترەمپ بۆ سووریا پەیوەندییەکی تەلەفۆنییان ئەنجامدا و تەوەری سەرەکی گفتوگۆکانیشان بارودۆخی ئێستای سووریا بوو کە دابەشبووە بەسەر ئەم چەند خاڵەی خوارەوە:- 

ئاسایش و سەروەری: پشتیوانیکردن لە هەوڵەکانی حکومەتی سووریا بۆ دەستەبەرکردنی یەکپارچەیی خاک و سەقامگیری.

دۆخی حەلەب: هەماهەنگیی بەردەوام بۆ گەیشتن بە ئاگربەستێکی هەمیشەیی لەو شارەدا.

پاراستنی هاووڵاتییان: گەرەنتی کردنی ماف و سەلامەتیی سەرجەم پێکهاتەکانی سووریا بەبێ جیاوازی.

ئەوەی پێویستە بیزانیت: هەر لەمیانەی ئەو گفتوگۆیەدا نوێنەری ئەمریکا بۆ سووریا، جەختی لەسەر پێویستی جێبەجێکردنی دەستبەجێی ڕێککەوتننامەی 10ی ئازاری 2025 کردەوە، کە پێشتر هەردوو حکومەتی سووریا و هێزەکانی سووریای دیموکرات پابەندبوون پێیەوە.