خەڵکی کەرکووک گردبوونەوە و داوا دەکەن جیهان بۆ ڕۆژئاوا کوردستان بێنە دەنگ

ئاڤا میدیا 

 

ئەمڕۆ، شەممە، لەشاری كەركووك، ژمارەیەكی زۆری لە نوێنەرانی خەڵكی شارەكە گردبوونەوەیەكی ناڕەزاییان دژی هێرشكردنە سەر گەڕەكە كوردییەكانی شاری حەلەب سازكرد و دروشمیان دژی كۆمەڵكوژكردنی گەلی كورد دەوتەوە.

 

وێنە گەورەكە: هێرشی سوپای عەرەبیی سووریا بۆ سەر دوو گەڕەكی كوردنشینی حەلەب (شێخ مەقسود و ئەشرەفییە) بەردەوامە؛ بەهۆیەوە دانیشتووانی هەردوو گەڕەك ڕووبەڕووی ڕاگوێزران و ئاوارەیی بوونەتەوە، مەترسی ئەوە دەكرێت هاوشێوەی ناوچەكانی درووزییەكان، هێرشی كۆكۆژیی و سوكایەتی بە تاكی كورد لەو دوو گەڕەكە لەلایەن چەكدارە عەرەبەكانی سەر بە سوپای سووریا ئەنجام بدرێت، هەر بۆیە لە شار و شارۆچكەكانی هەرێمی كوردستان و ناوچە كوردستانییەكانی دەرەوەی ئیدارەی هەرێمی كوردستان، هاوسۆزی و پشتیوانیی خۆیان بۆ كوردانی ڕۆژئاوا دەردەبڕن.

 

ئەوەی دەگوزەرێت: چین و توێژە جیاجیاكانی شاری كەركووك، كە چالاكوان، مامۆستا، نووسەر، ڕۆژنامەنووس و مامۆستایانی ئایینی لەخۆگرتبوو، لە گردبوونەوەیەكی ناڕەزاییدا پاڵپشتیی خۆیان بۆ كوردانی ڕۆژاوا دەربڕی و پەیامێكیان ئاڕاستەی ڕای گشتی و ئەنجوومەنی ئاسایشی نێودەوڵەتی كرد.

 

لە پەیامەكەیاندا، جەختیان لە گرنگیی جێبەجێكردنی چەند خاڵێك كردەوە، كە ئەمانەن:

• هەرچی زووە شەڕ لە هەموو بەرەكاندا بوەستێت.

• كشانەوەی هێزەكانی سوپای عەرەبیی سووریا لە هەردوو گەڕەكی ئەشرەفیە و شێخ مەقسوود.

• سپاردنی ئاسایشی هەردوو گەڕەك بە هێزێكی ئاشتی پارێز.

• گەڕاندنەوەی خێزانە ئاوارەبووەكان بۆ سەر ماڵ و حاڵی خۆیان.

• جێبەجێكردنی ڕێككەوتنامەی نێوان سووریای دیموكرات و حكومەتی سووریا.