ئاسایشی حەلەب: بانگەشەی بوونی "توونێل" لەژێر نەخۆشخانەی خالید فەجر دوورە لە ڕاستییەوە

ئاڤا نیوز

هێزەکانی ئاسایشی ناوخۆ لە شێخ مەقسوود، سەرجەم ئەو تۆمەتانەی سوپای سووریایان ڕەتکردەوە کە باس لە بوونی "توونێل" لەژێر نەخۆشخانەی خالید فەجر دەکەن؛ ئاسایش ئەمە بە هەوڵێکی "چەواشەکاری" بۆ داپۆشینی تاوانەکانی دیمەشق ناو دەبات.

وێنە گەورەکە: حکومەتی سووریا لە ڕێگەی بڵاوکردنەوەی هەواڵی بوونی "ژێرخانی سەربازی و توونێل" لە ناوەندە تەندروستییەکاندا، دەیەوێت شەرعییەت بداتە بۆردومانکردنی ئەو نەخۆشخانانەی کە سەدان برینداری مەدەنییان تێدایە.

ڕاگەیێنراوی فەرمی: ناوەندی ڕاگەیاندنی ئاسایشی شێخ مەقسوود لە ڕاگەیەندراوێکی فەرمیدا ئاماژەی بەوەدا: هیچ جۆرە توونێلێک لە ژێر نەخۆشخانەی "خالید فەجر" بوونی نییە و بانگەشەکان تەنیا "درۆن". میلیشیاکانی سەر بە دیمەشق دەیانەوێت پاساو بۆ کوشتنی بریندارانی مەدەنی، ژنان و منداڵان لە ناو نەخۆشخانەکەدا بدۆزنەوە.

٠ ئاسایش داوا لە لیژنە نێودەوڵەتییە سەربەخۆکانی مافی مرۆڤ دەکات دەستبەجێ بچنە ناو نەخۆشخانەکە و لە نزیکەوە پووچەڵبوونی ئەو تۆمەتانە ببینن.

زانیاریی زیاتر: هێرشەکانی سوپای سووریا بۆ سەر گەڕەکەکانی شێخ مەقسوود و ئەشرەفییە، جگە لە زیانی گیانی، بووەتە هۆی پەککەوتنی زۆربەی خزمەتگوزارییە سەرەتاییەکان. ئێستا نەخۆشخانەی خالد فەجر نەک هەر شوێنی چارەسەرە، بەڵکو بووەتە پەناگەی دەیان خێزانیش کە بەهۆی بۆردومانەکانەوە ماڵەکانیان وێران بووە.