پرۆسەی بە دیجیتاڵکردنی پسوولەی خۆراک کارا دەکرێت

ئاڤا نیوز

وەزارەتی بازرگانی هەرێمی کوردستان پێداویستی لۆجیستی بۆ قۆناغی دووەمی پڕکردنەوەی فۆڕمی خۆراک ئامادەکردووە، چاوەڕێی وەزارەتی بازرگانی عێراق دەکات، بۆ ئەوەی چەند خزمەتگوزارییەکی دیکە کارا بکرێت.

 

چیرۆکی سەرەکی: پرۆسەی بە دیجیتاڵکردنی پسوولەی خۆراک گەیشتووەتە قۆناغی کۆتایی؛ تاوەکو ئێستا 93%ـی هاووڵاتییان ناوی خۆیان تۆمار کردووە و تەنیا 7% ماون. چەند ڕۆژێکە سیستمەکە کاراکراوەتەوە و بڵۆکی ئەو کەسانە لابراوە کە ئەندامی خێزانێکن و لە قۆناغی یەکەم تۆمارنەکراوە.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت: "ئەو تیمەی سەرپەشتی پرۆسەی بە دیجیتاڵیکردنی پسوولەی ئەلیکترۆنی خۆراک دەکات، دەبێت لە سەرجەم پارێزگاکان کۆمپیوتەرەکان فۆڕمات بکاتەوە، ئەپدەیتی نوێ بۆ سیستەمەکە زیاد بکات، ئینجا لە هەموو عێراق خزتمەگوزارییە نوێیەکان کارا دەبن."

 

زانیاریی زیاتر: بە گوتەی بەڕێوەبەری گشتیی بازرگانی، هەموو ئەو مامەڵە نوێیانەی (زیادکردنی منداڵ و هاوسەرگیری و گواستنەوە) کە لە کۆتایی مانگەوە دەستپێدەکەن، بە پارە دەبن، پارەکە تەنیا لە ڕێگەی "ڤیزا کارت"ـەوە وەردەگیرێت و پارەی نەقد (کاش) قبووڵ ناکرێت.