ئەمریکا ڤیزای 100 هەزار کەس هەڵدەوەشێنێتەوە

ئاڤا نیوز

وەزارەتی دەرەوەی ئەمریکا بڕیارێکی توندی بۆ هەڵوەشاندنەوەی ڤیزای زیاتر لە 100 هەزار هاووڵاتیی بیانی دەرکرد؛ ئەم هەنگاوە بەهۆی تێوەگلانی ئەو کەسانەیە لە چالاکیی تاوانکاری و وەک بەشێک لە "پاراستنی ئاسایشی ناوخۆ" دەبینرێت.

وێنە گەورەکە: ئەم بڕیارە وەرچەرخانێکی توندە لە سیاسەتی کۆچبەران و نشینگەی ئیدارەی نوێی ئەمریکا بەرامبەر بەو بیانییانەی لە ناوخۆی وڵاتدا یاساکان دەبەزێنن. واشنتن دەیەوێت لە ڕێگەی ئەم "هەڵوەشاندنەوە بەکۆمەڵە"وە، پەیامێکی ڕوون بنێرێت کە مانەوە لە ئەمریکا "ماف" نییە، بەڵکو بەستراوەتەوە بە پابەندبوونێکی ڕەها بە یاسا فیدراڵییەکانەوە.

چیرۆکی سەرەکی: ئەمریکا بەمشێوەیە بڕیارەکەی جێبەجێ دەکات؛-

خوێندکاران: هەشت هەزار ڤیزای خوێندن بەهۆی پێشێلکارییەوە هەڵوەشێنراونەتەوە.

سەردانیکەران: دوو هەزار و 500 ڤیزای تایبەت لە گەشتیاران و سەردانیکەرانی ئەمریکا وەرگیراونەتەوە.

کۆی گشتی: پتر لە 100 هەزار کەس لەم هەڵمەتەدا زیانیان بەرکەوتووە.

بۆچی گرنگە: ئەم بڕیارە تەنیا ئەو کەسانە دەگرێتەوە کە پێشینەی "تاوان" یان "پێشێلکاریی یاساییان" لای هێزە ئەمنییەکانی ئەمریکا تۆمار کراوە. هەڵوەشاندنەوەی ڤیزاکانیان ڕێگەی یاسایی خۆش دەکات بۆ دەستپێکردنی پڕۆسەی "دیپۆرتکردنەوەی خێرا" بێ ئەوەی پارێزبەندیی ڤیزاکانیان مابێت.

ڕاگەیێنراوی فەرمی: وەزارەتی دەرەوەی ئەمریکا لە ڕاگەیەندراوێکدا جەختی کردەوە: "پرۆسەی دەرکردن و دیپۆرتکردنەوەی ئەو کەسانەی وەک تێکدەر و تاوانبار پۆلێن کراون بەردەوام دەبێت؛ ئەم هەنگاوە لە چوارچێوەی هەوڵەکانماندایە بۆ گەرەنتییکردنی ئاسایشی ناوخۆی وڵات."