وەزارەتی ناوخۆی عێراق: هەر کەسێک گەشتیاران بێزار بکات سزا دەدرێت

ئاڤا نیوز

وەزارەتی ناوخۆی عێراق هۆشداری دەداتە ئەو کەسانەی ئاستەنگ و بێزاری بۆ گەشتیاران دروست دەکەن و ڕایدەگەیەنێت، هەر کەسێک گێچەڵ بە گەشتیاران بکات، ڕووبەڕووی سزای یاسایی و دەستگیرکردن دەبێتەوە.

لێدوانی فەرمی: عەباس بەهادلی، گوتەبێژی وەزارەتی ناوخۆی عێراق ڕایگەیاند: وەزارەتی ناوخۆ ڕێکاری توند بەرامبەر هەر کەسێک کە زیان بە ناوبانگی عێراق بگەیەنێت و گەشتیاران بێزار بکات دەگرێتە بەر؛ سەرپێچکاران بەدەر لە ئاگادارکردنەوە و هۆشداری، دەستگیرکردن و سزادانی یاسایییش دەیانگرێتەوە.

٠ بەهادلی ئاماژەی بەوەش کرد، ژمارەی (911) لە خولەکێکدا 150 پەیوەندی وەردەگرێت و بە خێرایی و شەفافییەت مامەڵە لەگەڵ سکاڵاکاندا دەکرێت؛ هاوکات زانیارییەکانی پەیوەندیکەر بە تەواوی بە نهێنی دەمێننەوە.

ئەوەی پێویستە بیزانیت: لەم دواییانەدا حاڵەتەکانی بێزارکردنی گەشتیارانی بیانی و عەرەب لەلایەن هەندێک گەنجەوە بە شێوەی شوێنکەوتن و بەکارهێنانی دەستەواژەی نەشیاو بە شێوەیەکی بەرچاو زیادی کردووە؛ هاوکات لە تۆڕە کۆمەڵایەتییەکاندا چەند گرتەیەکی ڤیدیۆیی بڵاو بوونەتەوە، لەوانە: شوێنکەوتنی گەشتیارێکی ژاپۆنی لەلایەن چەند گەنجێکەوە، گێچەڵکردن بە گەشتیارێکی دیکە و هاوسەرەکەی و قسەی نەشیاو گوتن بە گەشتیارانی ڕووسی لە بەغدا.