ئیدارەی ترەمپ سێ لقی ئیخوان موسلمینی خستە لیستی تیرۆر

ئاڤا نیوز 

 

ئیدارەی دۆناڵد ترەمپ، سەرۆکی ئەمریکا، بەڵێنەکەی جێبەجێ کرد و سێ لقی ئیخوان موسلمینی لە سێ وڵاتی ڕۆژهەڵاتی ناوەڕاست وەک ڕێکخراوی تیرۆریستی ناساند.

 

بۆچی گرنگە: ئەم بڕیارە کە سزای توندی دارایی لەگەڵدایە، ئەگەری هەیە کاریگەری لەسەر پەیوەندییەکانی واشنتن لەگەڵ هەریەکە لە قەتەر و تورکیا هەبێت.

 

ڕاگەیێنراوی فەرمی: وەزارەتەکانی دەرەوە و گەنجینەی ئەمریکا ڕایانگەیاند، لقەکانی ئیخوان موسلمین لە لوبنان، ئوردن و میسر خراونەتە لیستی تیرۆر، بەو پێیەی مەترسین بۆ سەر بەرژەوەندییەکانی ئەمریکا.

 

- وەزارەتی دەرەوەی ئەمریکا لقی لوبنانی ئیخوان موسلمینی وەک ڕێکخراوێکی "تیرۆریستی بیانی" ناساند، کە ئەمە توندترین پلەی پۆلێنکردنە و بەپێی یاسا هەر جۆرە هاوکارییەکی دارایی یان ماددی بۆ ئەو گروپە بە تاوان هەژمار دەکرێت.

 

- هاوکات، وەزارەتی گەنجینە لقەکانی ئوردن و میسری وەک تیرۆریستی جیهانی دەستنیشان کرد، بە تۆمەتی پێشکەشکردنی هاوکاری بۆ بزوتنەوەی حەماس.

 

هۆکارە زانراوەکان: مارکۆ ڕوبیۆ، وەزیری دەرەوەی ئەمریکا، لە بەیاننامەیەکدا ڕایگەیاند، ئەم بڕیارە سەرەتای هەوڵێکی بەردەوامە بۆ پەکخستنی توندوتیژی و تێکدانی سەقامگیری لەلایەن لقەکانی ئیخوان موسلمین. ئەمریکا هەموو ئامرازەکان بەکاردێنێت بۆ بڕینی سەرچاوە داراییەکانیان.