ڕوانگەی سووری: ئەوەی لە شێخ مەقسوود دەگوزەرێت تاوانی جەنگی تەواوە

ئاڤا نیوز

بەڕێوەبەری ڕوانگەی سووری بۆ مافەکانی مرۆڤ دەڵێت، ئەوەی لە گەڕەکەکانی شێخ مەقسوود و ئەشرەفیەی حەلەب ڕوو دەدات، "تاوانی جەنگی تەواوە" و هەر کەسێک پاساو بۆ ئەم کوشتارە بهێنێتەوە هاوبەشی تیرۆرە.

 

لێدوانی فەرمی: ڕامی عەبدولڕەحمان، بەڕێوەبەری ڕوانگەی سووری بۆ مافەکانی مرۆڤ ڕایگەیاند، ئەو گوتارانەی لە میدیاکانەوە کورد وەک "کۆچبەر و میوان" نیشان دەدەن، تەنیا چەواشەکارییە بۆ ڕەوایی دان بە ڕاگواستنی زۆرەملێ و پاکتاوی ڕەگەزی کە بە ڕێنمایی ڕاوێژکارە تورکەکان لە دژی پێکهاتەکان ئەنجام دەدرێت.

 

- ئەحمەد شەرع و حکومەتەکەی خەریکی برەودانن بە تووندڕەویی مەزهەبی و سوود لە فەرماندەی گرووپەکانی وەک سوڵتان موراد، حەمزات و عەمشات وەردەگرن، کە سەرجەمیان لەسەر ئاستی نێودەوڵەتی بەهۆی تاوانەکانیان لە عەفرین و کەناراوەکان سزادراون. 

 

ئەوەی پێویستە بیزانیت: بەڕێوەبەری ڕوانگەکە هۆشداری دا کە بەکارهێنانی دەستەواژەی "پەکەکەی تیرۆریست" تەنیا بیانوویەکە بۆ ئەنجامدانی کۆمەڵکوژیی نوێ، وەک ئەوەی لە سوەیدا و ناوچەکانی دیکە ڕوویدا.

 

- دووپاتی کردەوە شەرعیەتی نێودەوڵەتی تەنیا بە گرتنەبەری ڕێگەی لێپرسینەوە دەچەسپێت، چونکە ئەم حکومەتە تەنیا خزمەت بە ئەجێندای دەرەکی دەکات و هیچ لۆژیکێکی نیشتمانی لە مامەڵەکانیدا بەرامبەر بە پێکهاتە جیاوازەکانی سووریا نییە.

 

باکگراوند: ڕۆژی 6ـی ئەم مانگە هێرشی سوپای عەرەبی سووریا بۆسەر گەڕەکە کوردییەکانی حەلەب دەستی پێکرد، دوای پێنج ڕۆژ لە بەرگریی لەلایەن هێزەکانی ئاسایشی ناوخۆی حەلەب ئاگربەستێکی کاتی بۆ گواستنەوەی هاووڵاتییانی مەدەنی و برینداران ڕاگەیێنرا.