وەزیری بەرگریی هۆڵەندا هێزەکانی وڵاتەکەی لە کوردستان بەسەردەکاتەوە

ئاڤا نیوز

وەزیری بەرگریی هۆڵەندا و بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان، پتەوکردنی پەیوەندییەکانی نێوان هەردوولا تاوتوێ دەکەن.

چیرۆکی سەرەکی: ئەمڕۆ پێنجشەممە، 15-01-2026، بەمەبەستی بەسەرکردنەوەی هێزەکانیان لە هەرێمی کوردستان، ڕۆبن برێکلمانس، وەزیری بەرگریی هۆڵەندا گەیشتە هەولێر و لەلایەن سەفین موحسین دزەیی، بەرپرسی پەیوەندییەکانی دەرەوەی حکومەتەوە پێشوازیی لێکرا.

بڵاوکراوەی فەرمی: پەڕەی فەرمیی فەرمانگەی پەیوەندییەکانی دەرەوە بڵاویکردووەتەوە، لە کۆبوونەوەکەدا باس لە گرنگی و بایەخی زیاتر پتەوکردنی پەیوەندییەکانی نێوان هەرێمی کوردستان و هۆڵەندا کراوە.

سەفین دزەیی سوپاسی هەڵوێستی حکومەتی هۆڵەندای کرد کە لە سەرجەم قۆناغەکاندا پشتگیریی لە هەرێمی کوردستان کردووە، بە تایبەت لە هاوکاریکردنی هێزەکانی پێشمەرگە لە شەڕی دژی تیرۆریستانی داعشدا.

ئەمەش بزانە: لە شەڕی دژی داعشدا، هێزەکانی هۆڵەندا لە چوارچێوەی هاوپەیمانیی نێودەوڵەتیدا هاوکاریی سەربازییان پێشکەش بە هەرێمی کوردستان کردووە و زیاتر لە 100 سەربازیان لە هەولێر هەبووە. ئێستا هێزەکانی هۆڵەندا ڕۆڵی ڕاوێژکاری و مەشقپێدانی هێزەکانی پێشمەرگە دەگێڕن و ژمارەیان دیاریکراوە.