پارتی لە ڕێگەی ئاڤا میدیا وەڵامی چاڵێنجی بافڵ تاڵەبانی و شاسوار عەبدولواحید دەداتەوە

ئاڤا نیوز

پارتی دیموکراتی کوردستان لەبارەی پێکهێنانی کابینەی نوێ حکومەتی هەرێمی کوردستان لە ڕێگەی ئاڤاوە وەڵامی بۆ دەستپێشخەرییەکەی بافڵ تاڵەبانی و شاسوار عەبدولواحید نارد و گوتی، ئەوان براوەی یەکەمی هەڵبژاردنن و هیچ لایەنێک ناتوانێت بەبێ پارتی کابینەی نوێی حکومەت پێکبهێنێت.

چیرۆکی سەرەکی: شاسوار عەبدولواحید، سەرۆکی جوڵانەوەی نەوەی نوێ ئەمڕۆ پێنجشەممە دوای ئازادبوونی لە زیندان دوای پێنج مانگ، کۆنگرەیەکی ڕۆژنامەوانی ڕێکخست و دەستپێشخەری بۆ یەکێتی، یەکگرتوو، هەڵوێست و کۆمەڵ کرد حکومەت بەبێ پارتی پێکبهێنن و ڕاستەوخۆش بافڵ تاڵەبانی دەستپێشخەرییەکەی قبوڵ کرد، شاسوار عەبدولواحیدیش ئامادەیی دەربڕی پێشوازییان لێ بکات.

لێدوانی فەرمی: لە وەڵامی هەوڵەکەی یەکێتی و نەوەی نوێ، سەرچاوەیەک لە لیژنەی دانوستانکاری پارتی بە ئاڤا میدیای ڕاگەیاند: ئێمە براوەی یەکەمی هەڵبژاردنین و زۆرینەی کورسییەکانی پەرلەمان هی ئێمەن، بۆیە هیچ لایەنێک بەبێ ئێمە ناتوانێت حکومەت پێکبهێنێت.

٠ لە گفتوگۆکردن بەردەوامین بۆ پێکهێنانی حکومەتی کوردستان، لەگەڵ یەکێتی هەنگاوی باشمان ناوە بۆ پێکهێنانی حکومەت.

٠ بەپێی ئەنجام و ئیستیحاقی هەڵبژاردنی پەرلەمانی کوردستان، دەرگای گفتوگۆمان کراوەیە بۆ هەموو لایەنەکان، پێویستە ڕێز لە دەنگ و متمانەی خەڵکی کوردستان بگیرێت.

ئەوەی پێویستە بیزانیت: بۆ هەڵبژاردنی سەرۆکی هەرێم و ڕاسپاردنی سەرۆکوەزیران، پێویست بە 51 کورسی (50+1) هەیە، پارتی دیموکراتی کوردستان بە تەنیا خاوەنی 39 کورسییە و تەنیا پێویستی بە 12 کورسیی ترە بۆ تەواوکردنی زۆرینە، یەکێتی (23 کورسی) و نەوەی نوێ (15 کورسی) پێکەوە تەنیا 38 کورسییان هەیە؛ واتە تەنانەت بە هاوپەیمانێتیش، نەک هەر ناتوانن حکومەت پێکبهێنن، بەڵکو کورسییەکانیان یەک کورسی لە پارتی کەمترە.