نێچیرڤان بارزانی پەیوەندییەکی تەلەفۆنی لە ماکرۆنەوە پێگەیشت لەبارەی ڕۆژئاوای کوردستان

ئاڤا نیوز

 

نێچیرڤان بارزانی، سەرۆکی هەرێمی کوردستان و ئیمانوێل ماکرۆن، سەرۆکی فەرەنسا لە پەیوەندییەکی تەلەفۆنیدا نيگه‌رانيى قووڵيان به‌رامبه‌ر به ئاڵۆزى و پێکدادانەکانی ئەمدواییانەی سووريا ده‌ربڕى و داوايان كرد هه‌موو لايه‌ك دۆخه‌كه‌ هێور بکەنەوە.

 

چیرۆکی سەرەکی: دوای نيوه‌ڕۆى ئه‌مڕۆ شه‌ممە 17-1-2026 نێچيرڤان بارزانى، سه‌رۆكى هه‌رێمى كوردستان، په‌يوه‌ندييه‌كى ته‌له‌فۆنيى لە ئيمانوێل ماكرۆن، سه‌رۆكى فه‌ره‌نسا پێگه‌يشت؛ دۆخى عێراق، هه‌رێمى كوردستان و ڕۆژهه‌ڵاتى ناوه‌ڕاست تاوتوێ کرا و به‌تايبه‌تىیش پێشهاته‌كانى ئەمدواییەی سووريا.

 

ڕاگەیێنراوی فەرمی: سەرۆکایەتیی هەرێمی کوردستان بڵاوی کردەوە، "هه‌ردوولا نيگه‌رانيى قووڵيان به‌رامبه‌ر به ئاڵۆزى و پێکدادانەکان له‌ سووريا ده‌ربڕى و داوايان كرد هه‌موو لايه‌ك دۆخه‌كه‌ هێور بکەنەوە، پشتگيريشيان بۆ ده‌ستبه‌جێ ده‌ستپێكردنه‌وه‌ى گفتوگۆكان بۆ جێبه‌جێكردنى ڕێككه‌وتنى 10ـی ئادارى نێوان هه‌سه‌ده‌ و حكوومه‌تى سووريا ده‌ربڕى و جه‌ختيان له‌ پاراستنى خه‌ڵكى سڤيل كرده‌وه‌.

 

- ماكرۆن ستايشى ڕۆڵ و هه‌وڵه‌كانى نێچيرڤان بارزانى کرد بۆ ميانگيرى و هه‌وڵه‌كانى له‌پێناو ئارام كردنه‌وه‌ى دۆخى سووريا و ڕێگه‌گرتن له‌ ئاڵۆزيى زياتر.

 

- نێچيرڤان بارزانى جەختی کردەوە پێویستە مافه‌كانى گەلی كورد له‌ ده‌ستوورى داهاتووى سووريا جێگير بكرێن، سوپاس و پێزانینی بۆ ڕۆڵ و پشتگيريى ئیمانوێل ماكرۆن و فەرەنسا له‌پێناو نه‌هێشتنى گرژى و ئاڵۆزييه‌كان و پاراستنی سەقامگیریی ناوچەکەدا، دەربڕی.

 

لەلایەکی دیکە: هاوکات هەر ئەمڕۆ ڕۆژی شەممە 17ی كانوونی دووەمی 2026 لە پیرمام سەرۆك مەسعود بارزانی میوانداریی كۆبوونەوەیەكی گرنگی كرد لەنێوان باڵیۆز تۆماس باراك، نێردەی تایبەتی سەرۆكی ئەمەریكا بۆ كاروباری سووریا و ویندی گرین، كونسوڵی گشتیی ئەمەریكا لە هەولێر و ژەنراڵ كێڤن لامبارت، فەرماندەی هێزەكانی ئەمەریكا لە سووریا و كۆڵۆنێڵ زاكاریا كۆرك و ژەنەڕاڵ مەزڵووم عەبدی، فەرماندەی گشتیی هێزەكانی سووریای دیموكرات و محەممەد ئیسماعیل، سەرۆكی ئەنەكەسە.

 

- هەر  ئەمڕۆ شەممە بارەگای بارزانی دوای کۆبوونەوەی چوارقۆڵی سەرۆك بارزانی، تۆماس باراك، مەزڵووم عەبدی و سەرۆكی ئەنەكەسە پەیوەست بە - دۆخی سووریا و گرژییەکانی ئەمدواییەی سوپای سووریا و هەسەدە لە حەلەب، دێر حافر و مەسکەنە- بڵاوی کردەوە: لە کۆبوونەوەکەدا سەرۆك بارزانی جەختی لە بایەخ و گرنگیی دیالۆگ و سەقامگیری و پێكەوەژیان لە سووریای نوێ كردەوە.