فوئاد حوسێن گەیشتە تاران؛ کۆنترۆڵکردنی سنوورەکان تەوەری سەرەکی گفتوگۆکانە

ئاڤا نیوز

فوئاد حوسێن، وەزیری دەرەوەی عێراق، ئەمڕۆ یەکشەممە بە سەردانێکی فەرمیی گەیشتە ئێران. ئامانج لە سەردانەکە تاوتوێکردنی "پەیوەندییە دووقۆڵییەکان و هەماهەنگییە ئەمنییەکانی نێوان بەغدا و تارانە".

 

وێنە گەورەکە: ئەم سەردانە لە کاتێکدایە کە ناوچەکە بە دۆخێکی هەستیاردا تێدەپەڕێت و پێکدادانەکان لە سووریا تووندبوونەتەوە و نزیکەی دوو هەفتە زیاتریشە خۆپیشاندان و ناڕەزایەتی ئێرانی گرتووەتەوە، گفتوگۆکانی فوئاد حوسێن لەگەڵ بەرپرسانی باڵای تاران تایبەت دەبێت بە پرسی پاراستن و سەقامگیریی عێراق و ناوچەکە.

 

ڕاگەیێنراوی فەرمی: بەپێی ڕاگەیێنراوی وەزارەتی دەرەوەی عێراق، بڕیارە فوئاد حوسێن لەگەڵ مەسعود پزیشکیان، سەرۆککۆماری ئێران و محەممەد باقر قالیباف، سەرۆکی پەرلەمان کۆببێتەوە. هەروەها زنجیرەیەک دیداری جیاواز لەگەڵ عەباس عێراقچی، وەزیری دەرەوە و عەلی لاریجانی، ئەمینداری ئەنجوومەنی ئاسایشی نیشتمانی ئەنجام بدات.

لەلایەکی دیکەوە سەرچاوەیەکی بەرپرس بە ئاژانسی هەواڵی عێراقی ڕاگەیاند، ئامانجی سەرەکیی سەردانەکە تاوتوێکردنی پەیوەندییە دووقۆڵییەکان و هەماهەنگییە ئەمنییەکانی نێوان بەغدا و تارانە، بەتایبەتی لەبارەی کۆنتڕۆڵکردنی سنوورەکان و ڕێگری لە گرووپە تیرۆریستییەکان.

زانیاریی زیاتر: هەر بەگوێرەی ڕاگەیێنراوەکە، تەوەری سەرەکیی گفتوگۆکانی فوئاد حوسێن لەم سەردانەدا، بریتی دەبێت لە تاوتوێکردنی پەیوەندییە دووقۆڵییەکانی نێوان هەردوو وڵات و گفتوگۆکردن دەربارەی دوایین پێشهات و گرژییەکانی ناوچەکە، بە ئامانجی بەهێزکردنی سەقامگیری و پشتگیریکردن لە دیالۆگی ناوچەیی.