چوارچێوەی هەماهەنگی کۆ دەبێتەوە و بڕیار لەسەر کاندیدی سەرۆکوەزیران دەدات

ئاڤا نیوز

 

ئەندامێکی باڵای چوارچێوەی هەماهەنگی بە ئاڤا میدیای ڕاگەیاند: بڕیارە سبەی دووشەممە چوارچێوەی هەماهەنگی بۆ گفتوگۆکردن لەبارەی دیاریکردنی کاندیدێک بۆ پۆستی سەرۆکوەزیران کۆ ببێتەوە.

 

وێنە گەورەکە: بڕیار بوو ڕۆژی یەکشەممە چوارچێوەی هەماهەنگی لە بەغدا کۆبێتەوە و بەڕەسمی ناوی کاندیدەکەیان ڕابگەیەنێت. د.عەلی دەفاعی، ئەندامی مەکتەبی سیاسیی ئەنجوومەنی باڵای ئیسلامی کە هومام حەمودی سەرۆکایەتی دەکات بە ئاڤا میدیای ڕاگەیاند: بەهۆی تەواونەبوونی گفتوگۆکان کۆبوونەوەی دوێنێ یەکشەممە خرایە سبەی دووشەممە.

 

لەلایەکی دیکە: زوهێر چەلەبی، سەرکردە لە دەوڵەتی یاسا بە ئاڤای ڕاگەیاند نوری مالیکی، سەرۆکوەزیرانی داهاتووی عێراقە و گفتوگۆکان تەواو بوون، تەنیا هەنگاوێک ماوە کە بەڕەسمی مالیکی ببێتە بەربژێری چوارچێوەی هەماهەنگی.

 

- هەرکاتێک گفتوگۆکان تەواو بن بەڕەسمی ناوی کاندیدی چوارچێوەی هەماهەنکی ڕادەگەیەنین.

 

زانیاریی زیاتر: بەگوێرەی زانیاریی میدیاکانی عێراق ئایەتوڵڵا عەلی سیستانی، مەرجەعی باڵای شیعەکان و موقتەدا سەدر، ڕێبەری ڕەوتی شیعە ڕازی بوون نووری مالکی ببێتەوە بە سەرۆکوەزیرانی داهاتووی عێراق.

 

باکگراوند: ڕۆژی 10 -1 -2026 چوارچێوەی هەماهەنگی لە بەیاننامەیەکدا ئاشکرای کرد، کاندیدی سەرۆکوەزیران یەکلا کراوەتەوە و کەسێکیان دەستنیشان کردووە بۆ ئەم پۆستە. 

 

- هەر هەمان ڕۆژ، سەرچاوەیەک لە نووسینگەی مالیکی بە ئاڤای ڕاگەیاند، مەبەستی بەیاننامەکەی چوارچێوەی هەماهەنگی: نووری مالیکیە.