ئەحمەد شەرع: لەگەڵ مەزڵووم عەبدی کۆدەبینەوە

ئاڤا نیوز

ئەحمەد شەرع، سەرۆکی سووریا ڕایگەیاند، لەگەڵ مەزڵووم عەبدی گەیشتوونەتە ڕێککەوتنی سەرەتایی بۆ ئاگربەست و گەڕانەوەی دامەزراوەکانی دەوڵەت بۆ ناوچەکانی ژێر کۆنترۆڵی هەسەدە.

چیرۆکی سەرەکی: ئێوارەی ئەمڕۆ ئەحمەد شەرع، سەرۆککۆماری سووریا ئاگربەستی لە سووریا ڕاگەیاند و ڕێککەوتنێکی 14 خاڵی لەگەڵ مەزڵووم عەبدی بە واژۆی هەردووکیان بڵاوکردەوە.

لێدوانی فەرمی: ئەحمەد شەرع، سەرۆکی سووریا ڕایگەیاند: "بنەمای ڕێککەوتنمان لەگەڵ مەزڵووم عەبدی ئاگربەستە و دەبێت دامەزراوەکانی دەوڵەت بچنە سەرجەم پارێزگاکان، بەتایبەتی دێرەزوور، ڕەققە و حەسەکە؛ دەوڵەت سەرپەرشتیی تەواوی جوگرافیای سووریا دەکات و سەرجەم دۆسیە هەڵپەسێردراوەکانی نێوانمان چارەسەر دەکرێن."

زانیاریی زیاتر: سەرۆکی سووریا ئاماژەی بەوە کرد کە مەزڵووم عەبدی، فەرماندەی گشتیی هەسەدە، بەهۆی خراپیی کەشوهەواوە نەیتوانیوە لە کۆبوونەوەکەی ئەمڕۆدا ئامادە بێت، بەڵام بڕیارە سبەی بە ئامادەبوونی تۆم باراک، نێردەی تایبەتی ترەمپ، کۆبوونەوەکە ئەنجام بدرێت.

٠ ڕێککەوتنەکە تەنها وەستاندنی شەڕ نییە، بەڵکو جێگیرکردنی هێزە ئەمنییە ناوخۆییەکان لەو ناوچانەی "تایبەتمەندیی خۆیان هەیە" دەگرێتەوە، کە تێیدا ناوی کارمەندە ئەمنییەکان بە هەماهەنگیی دیاری دەکرێت.

٠  شەرع داوای لە هۆزە عەرەبەکان کردووە پابەندی هێمنی بن تاوەکو بوار بۆ جێبەجێکردنی ئەم ڕێککەوتنە سیاسیی و سەربازییە خۆش بکرێت، کە تێیدا جەخت لەوە کراوەتەوە سووریا دەوڵەتێکی یەکگرتووە و هەموو لایەک کار بۆ هێورکردنەوەی دۆخەکە دەکەن.

باکگراوند: هەوڵەکان بۆ ئاشتیی دوای ئەوەیە کە دوێنێ 17-01-2026 لە پیرمام، کۆبوونەوەیەکی چوارقۆڵیی گرنگ بە سەرپەرشتیی سەرۆک بارزانی و ئامادەبوونی تۆم باراک، نێردەی ئەمریکا و مەزڵووم عەبدی بەڕێوەچوو، کە تێیدا جەخت لە بایەخی دیالۆگ و پێکەوەژیان لە سووریای نوێدا کرایەوە.