مەزڵووم عەبدی و ئەحمەد شەرع لە دیمەشق جێبەجێکردنی ڕێککەوتنە 14 خاڵییەکە تاوتوێ دەکەن

ئاڤا نیوز

بڕیارە ئەمڕۆ مەزڵووم عەبدی، فەرماندەیی گشتیی هێزەکانی سووریای دیموکرات (هەسەدە)، بچێتە دیمەشق و لەگەڵ ئەحمەد شەرع، سەرۆککۆماری سووریا کۆببێتەوە، ئامانجی سەرەکیی سەردانەکە بۆ گفتوگۆیە لەبارەی میکانیزمەکانی جێبەجێکردنی ئەو ڕێککەوتنە 14 خاڵییەی لە نێوان هەردوولادا واژۆ کراوە.

چیرۆکی سەرەکی: ئێوارەی ڕۆژی یەکشەممە، ئەحمەد شەرع، سەرۆککۆماری سووریا ڕێککەوتنێکی 14 خاڵی لەبارەی ئاگربەست و تێکەڵبوونەوەی هێزەکانی هەسەدە بە دامەزراوە سەربازییەکانی حکومەتی سووریا بە واژۆی خۆیی و مەزڵووم عەبدی بڵاوکردەوە.

زانیاریی زیاتر: لە کۆبوونەوەکەی ئەمڕۆی نێوانیان جەخت لە خاڵە جەوهەرییەکانی ڕێککەوتنەکە  دەکرێتەوە، کە گرنگترینیان یەکخستنی هێزە سەربازییەکان و تێکەڵکردنی هەسەدەیە لە چوارچێوەی سوپای نیشتمانیی سووریادا، لەگەڵ پاراستنی تایبەتمەندیی ئیدارەی خۆجێیی بۆ پارێزگای حەسەکە و دانانی پارێزگایەکی کورد بۆ ئەو شارە، هەروەکو لە ڕێکەوتنە 12 خاڵییەکە هاتووە.

هاوکات هەردوولا باس لە جێگیرکردنی مافە دەستوورییەکانی پێکهاتەکان، بەتایبەت کورد و دابەشکردنی دادپەروەرانەی سامانی سرووشتی و داهاتی نەوت و گاز دەکەن وەک بنەمایەک بۆ پاراستنی یەکپارچەیی خاکی سووریا و یەکسانی دابەشکردنی سامان.

ئەوەی پێویستە بیزانیت: بڕیاربوو دوێنێ مەزڵووم عەبدی بچێتە دیمەشق، بەڵام ئەحمەد شەرع وتی، بەهۆی خراپی ڕەوشی کەشوهەواوە نەیتوانیوە و ئەمڕۆ سەردانی دیمەشق دەکات.