دوای کشانەوەی هەسەدە سوپای عەرەبی سووریا چووە ناو بەنداوی تشرین

ئاڤا نیوز

کەناڵی فەرمی سووریا ڕایگەیاند، لە بەیانی ئەمڕۆ دووشەممەوە، هێزەکانی سووپای عەرەبی سووریا چوونەتە ناو بەنداوی تشرین و ئیدارەی بەنداوەکەیان وەرگرتووەتەوە.

ڕێککەوتنەکە بەمشێوەیە: لە چوارچێوەی ئەو ڕێککەوتنە 14ـخاڵیەی لەنێوان مەزڵووم عەبدی و ئەحمەد شەرع بڵاوکراوەتەوە، هەسەدە لە فەرمانگە حکومییەکانی پارێزگای حەلەب دەکشێتەوە، بەنداوی تشرین دەکەوێتە ئەو پارێزگایە و بەیانی ئەمڕۆ تەلەفزیۆنی سووریا بڵاویکردەوە سوپای سووریا چوونەتە ناو بەنداوی تشرین ئەمەش دوای کشانەوەی هەسەدە.

ئەم بەنداوە لەسەر ڕووباری فوڕات دروستکراوە، یەک ملیار و 900 ملیۆن مەتر سێجا ئاو دەگرێت، کارەبا بۆ مەنبج و شارۆچکەی کۆبانێ و دەیان گوندی ئەو ناوچەیە دابین دەکات.

ئەوەی پێویستە بیزانیت: بڕیارە ئەمڕۆ مەزڵووم عەبدی بگاتە دیمەشق و گفتوگۆ لەسەر ناوەرۆکی ئەو ڕێککەوتنە بکات کە بڕیارە لەنێوان هەردوولا بە تەواوی جێبەجێ بکرێت. بەپێی ڕێککەوتنەکە ناوچەکانی ڕۆژهەڵاتی فوڕات و شارە کوردییەکان تایبەتمەندیان لەبەرچاو دەگیرێت و هەسەدە تێکەڵ بە سوپای سووریا دەکرێت.

زانیاریی زیاتر: وەرگرتنی ئیدارەی بەنداوی تشرین لەلایەن سوپای سووریاوە لە کاتێکدایە، لەماوەی چەند ڕۆژی ڕابردوودا یەکێک لە ناوچە گەرمەکانی ڕووبەڕووبونەوە بوو لەنێوان هەسەدە و سوپای عەرەبی سووریا.