لە پارێزگای هەولێر زیاتر لە 45 ملیۆن لیتر نەوتی ماڵان دابەش دەكرێت

ئاڤا نیوز

لە سنووری پارێزگای هەولێر زیاتر لە 38 ملیۆن لیتر نەوتی سپی ماڵان بەسەر هاووڵاتیان دابەشكراوە، بڕیاریشە بڕی حەوت ملیۆن و 500 هەزار لیتر نەوتی دیكە بەسەر هاووڵاتیانی سەنتەری شاری هەولێر دابەش بكرێت.

چیرۆکی سەرەکی: هاوشێوەی ساڵانی ڕابردوو، وەزارەتی سامانە سروشتییەكانی حكومەتی هەرێمی كوردستان، نەوتی سپی ماڵانی بۆ سەدان هەزار خانەوادەی هەرێمی كوردستان دابین كردووە، دوای تەواوبوونی پرۆسەی دابەشكردنی نەوتی ماڵان لە ناوچە شاخاوییەكان و دەوروبەری شاری هەولێر، چەند ڕۆژێكە پرۆسەی دابەشكردنەكە گەیشتووەتە سەنتەری شاری هەولێر و هەر خێزانێک بڕی 100 لیتر نەوتی بەنرخی پاڵپشتیكراو بە 31 هەزار دینار پێدەدرێت.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر تایبەت بە ئاڤا ڕایگەیاند، لە ناوچە شاخاوییەكانی سنووری پارێزگای هەولێر و دەوروبەری شار، بڕی زیاتر لە 38 ملیۆن لیتر نەوتی ماڵان دابەشكراوە و ئێستا پرۆسەكە گەیشتووەتە سەنتەری شاری هەولێر و بڕی حەوت ملیۆن و 500 هەزار لیتر نەوتی ماڵان دابەش دەكرێت.

قایمقامی قەزای ناوەندیی هەولێر، دەڵێت: "ئەمساڵ نەوتی سپی بە میكانیزمێكی نوێ و جیاواز لە ساڵانی ڕابردوو دابەش دەكرێت، كە لەڕووی كردەییەوە شێوازەكەی باشتر و خێراترە؛ بریكارەكانی دابەشكردنی خۆراك بەسەر چوار بەنزینخانەی هەولێر دابەش كراون و لیستی ناوی خانەوادەكان ڕادەستی ئەو بەنزینخانانە كراون."

زانیاریی زیاتر: هەر پەیوەست بە بابەتی سووتەمەنی، قایمقامی قەزای ناوەندیی هەولێر دەڵێت:  توانراوە بە ڕێژەیەكی زۆر كۆنتڕۆڵی دەستكاریكردنی پێوەری نێو بەنزینخانەكان و جۆر و كوالێتی ئەو بەنزینەش بكرێت كە بە هاووڵاتیان دەدرێت لەڕێگەی گرتنەبەری شێوازی پشكنین و بەدواداچوونی كتوپڕ و لەناكاو بۆ بەنزینخانەكان.

ئەوەی پێویستە بیزانیت: دوای توندكردنی ڕێككارە سزاییەكان بەرامبەر ئەو بەنزینخانانەی كە سەرپێچیی ڕێنماییەكان دەكەن یاخود فێڵ لە پێوەر و جۆری بەنزین دەكەن، ئێستا فرۆشتنی بەنزینی خراپ و كوالێتی نزم بەڕاددەیەكی زۆر كۆنتڕۆڵ كراوە و هاوسەنگیمان ڕاگرتووە لەنێوان نرخ و كوالێتی بەنزین.