لە ڕەققە گرووپەکانی سەر بە دیمەشق هێرشدەکەنە سەر زیندانێکی داعش

ئاڤا نیوز

هەسەدە و یەپەژه دەڵێن: گرووپەکانی سەر بە دیمەشق بە درۆن و چەکی قورس هێرشیانکردووەتە سەر زیندانی "ئەقتان" لە شاری ڕەققە، ئەوان بەرپرسیاریەتی هیچ پێشهاتێک لەئەستۆ ناگرن کە بەهۆی ئەم هێرشانەوە ڕووبدات.

ڕاگەیێنراوی فەرمی: هێزەکانی سووریای دیموکرات (هەسەدە) و یەکینەکانی پاراستنی ژنان (یەپەژه)  ڕایانگەیاند: نیوەڕۆی ئەمڕۆ، گرووپە چەکدارەکانی سەر بە دیمەشق بە بەکارهێنانی درۆن و چەکی قورس، هێرشیانکردەسەر زیندانی "ئەقتان" لە شاری ڕەققە.

ئاماژەیان بەوەشکردووە، "هێزەکانیان وەڵامی هێرشەکەیان داوەتەوە و ڕێکاری پێویستیش بۆ ڕێگریی لە هەر پێشێلکارییەکی ئەمنیی گیراوەتەبەر، لە هەمان کاتیشدا هۆشداریی دەدات کە بەرپرسیاریەتی هەر پێشهاتێکی پەیوەست بەم هێرشە لە ئەستۆ ناگرن."

 

لەلایەکی دیکەوە: سوپای عەرەبیی سووریا ڕایگەیاند: ئەمڕۆ لە دوو شوێنی جیاواز لە لایەن هەسەدەوە هێرشیان کراوەتەسەر و  بەم هۆیەوە، سێ سەربازیان کوژراون، دەشڵێت: ڕێگریی لە بڵاوپێکردنی هێزەکانمان لە ڕەققە کراوە.

 

زانیاریی زیاتر: ئەم هێرشە لەکاتێکدایە دوێنێ هەسەدە و دیمەشق لەسەر ڕاگەیاندنی ئاگربەست لە سەراسنەری ناوچەکان، تێکەڵبوونەوەی تەواوەتی هێزە سەربازییەکان و بەڕێوەبردنی زیندانیی و سنوورەکان ڕێککەوتن.

 

ئەمەش بزانە: بەگوێرەی ڕێککەوتنەکەش ئیدارەی زیندانەکانی باکوور و ڕۆژهەڵاتی سووریا دەچێتە ژێر دەسەڵاتی دیمەشق، حکومەتی سووریاش گەرەنتی دابینکردنی مافە یاساییەکانی ئەم هێزانە دەکات.