وەزارەتی بەرگریی سووریا ئاگربەستی فەرمی لەگەڵ هەسەدە ڕاگەیاند

ئاڤا نیوز

وەزارەتی بەرگریی سووریا بە فەرمیی ڕاگرتنی شەڕ و ئاگربەستی گشتگیری لە هەموو بەرەکان لەگەڵ هێزەکانی سووریای دیموکرات "هەسەدە" ڕاگەیاند.

وێنە گەورەکە: ئەم ڕاگەیێنراوە فەرمییەی وەزارەتی بەرگریی، لە کاتێکدایە هەر یەکە لە مەزڵووم عەبدی فەرماندەی گشتی هێزە چەکدارەکانی "هەسەدە" و ئەحمەد شەرع، دوانیوەڕۆی ئەمڕۆ پەیوەندییەکی تەلەفۆنییان ئەنجامدا و دواتر هەردوولا لەسەر ڕاگرتنی شەڕ ڕێککەوتن، دوای بەدوای ئەو پەیوەندییە سەرۆکی سووریا ناوەڕۆکی ڕێککەوتنە 14 خاڵییەکەی لەگەڵ مەزڵووم عەبدی بڵاوکردوە و باسی لەوەشکرد سبەی کۆبوونەوەیەکی تایبەت لە دیمەشق ئەنجام دەدەن. 

ڕاگەیێنراوی فەرمی: وەزارەتی بەرگریی سووریا لە ڕاگەیێنراوێکدا ئاشکرای کرد: "لەسەر بنەمای ئەو ڕێککەوتنەی کە سەرۆک ئەحمەد شەرع لەگەڵ هێزەکانی سووریای دیموکرات ئەنجامی داوە، ئاگربەست لە هەموو بەرەکان و ڕاگرتنی تەواوەتیی کردەوە جەنگییەکان لە ناوچە جیاوازەکانی پێکدادان ڕادەگەیەنین."

زانیاریی زیاتر: وەزارەتی بەرگریی ڕاسپاردەی داوەتە سەربازانی سوپای عەرەبی سووریا کە لە ئاستی بەرپرسیارێتی و متمانەدا بن لە پاراستنی گیان و ماڵی هاووڵاتییان و هەوڵی چەسپاندنی سەقامگیریی و ئاسایش بدەن.

٠ ئەم ئاگربەستە هەموو ئەو ناوچانە دەگرێتەوە کە لە چەند ڕۆژی ڕابردوودا شەڕی تێدا بووە، بەتایبەتی ناوچەکانی دەوروبەری فورات، ئەمەش دوای ئەوە دێت کە هەردوولا لەسەر نەخشەڕێگەیەکی نوێ بۆ حوکمڕانیی هاوبەش و گەڕانەوەی خزمەتگوزارییەکان گەیشتنە لێکتێگەیشتن.

ئەوەی پێویستە بیزانیت: ئاگربەستەکە لەمڕۆوە 18-01-2026 چووەتە بواری جێبەجێکردنەوە؛ چاوەڕوان دەکرێت لە چەند کاتژمێری داهاتوو گۆڕانکارییەکان بە کردەی بچنە بوای جێبەجێ کردنەوە.

باکگراوند: ئەم ئاگربەستە فەرمییە دوای زنجیرەیەک پێکدادانی خوێناوی دێت کە لە حەلەبەوە تاوەکو بەنداوی تشرین درێژبووەوە؛ بەڵام پەیوەندییە تەلەفۆنییەکەی ماکرۆن لەگەڵ شەرع و کۆبوونەوە چوارقۆڵییەکەی پیرمام بە سەرپەرشتیی سەرۆک بارزانی و ئامادەبوونی نێردەی ئەمریکا، کلیل بوون بۆ گەیشتن بەم ئاگربەستە و دوورخستنەوەی مەترسیی شەڕی ناوخۆیی.