سبەی لە ناوەندەکانی خوێندنی هەولێر پشووی فەرمییە

ئاڤا نیوز

پارێزگای هەولێر بەهۆی شەپۆلی سەرما و بەفر و باران، سبەی سێشەممە 20-01-2026ـی لە سەرجەم قوتابخانە حکومیی و ناحکومییەکان کردە پشووی فەرمی.

ڕاگەیێنراوی فەرمی: نووسینگەی پارێزگاری هەولێر ڕایگەیاند: "دوای کۆبوونەوەی پارێزگار لەگەڵ قایمقامەکان و بەڕێوەبەری گشتیی پەروەردە، بڕیاردرا لەپێناو پاراستنی سەلامەتیی تەندروستیی قوتابییان، سبەی تەنها لە ناوەندەکانی خوێندنی حکومیی و ناحکومیی سەر بە پەروەردەی هەولێر پشوو بێت".

زانیاریی زیاتر: بڕیاری پشووەکە دوای هەڵسەنگاندنی وردی دۆخی کەشوهەوا لەلایەن لایەنە پەیوەندیدارەکانەوە دراوە، کە تێیدا جەخت لەوە کراوەتەوە شەپۆلی بەفر و باران و ئەو سەرما و سۆڵەیەی ڕووی لە ناوچەکە کردووە، ڕێگر دەبێت لە بەڕێوەچوونی پڕۆسەی خوێندن بە شێوەیەکی ئاسایی. پشووەکە تەنها ناوەندەکانی خوێندنی سەر بە بەڕێوەبەرایەتیی گشتیی پەروەردەی هەولێر دەگرێتەوە، ئەمەش وەک ڕێکارێکی کاتیی بۆ ڕێگریکردن لە هەر ڕووداوێکی نەخوازراو لە ئەنجامی نزمبوونەوەی پلەکانی گەرما و ئاستەنگییەکانی هاتوچۆ لە ناو شار و دەوروبەریدا پەیڕەو دەکرێت.

ئەوەی پێویستە بیزانیت: پشووەکە هەردوو کەرتی حکومیی و ناحکومیی دەگرێتەوە و مامۆستایان و فەرمانبەرانی ناوەندەکانی خوێندنی تێدایە. بەڵام بۆ فەرمانگە حکومییەکانی دیکە پشوو نییە و دەوامی ئاسایی خۆیان دەکەن، مەگەر بڕیارێکی دیکە لەو بارەیەوە دەربچێت.

پەیوەست بەم بابەتەوە: لە پارێزگای هەڵەبجە و ئیدارە سەربەخۆکانی گەرمیان و سۆرانیش پشووی فەرمی ڕاگەیێنراوە.