پەیامێکی نوێ لە مەزڵووم عەبدییەوە: ناوچە کوردییەکان هێڵی سوورن

ئاڤا نیوز

فەرماندەی گشتیی هێزەکانی سووریای دیموکرات (هەسەدە) ڕایدەگەیێنێت، حکومەتی سووریا سەرجەم دەستپێشخەرییەکانی ئاگربەستی لە دوو هەفتەی ڕابردوودا پشتگوێ خستووە و هێرشێکی سیستماتیکی بۆ قڕکردنی کورد دەستپێکردووە.

لێدوانی فەرمی: مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) دەڵێت: پاراستنی ناوچە کوردییەکان هێڵی سوورە و دیمەشق وەڵامی ئاشتی ناداتەوە، حکومەتی سووریا سەرجەم دەستپێشخەرییەکانی ئاگربەستی لە دوو هەفتەی ڕابردوودا پشتگوێ خستووە و هێرشێکی سیستماتیکی بۆ قڕکردنی کورد دەستپێکردووە.

فەرماندەی گشتیی هێزەکانی هەسەدە دەشڵێت: هێزەکانیان بەرەو ناوچە کوردنشینەکان کشاونەتەوە و پاراستنی ئەم شوێنانە "هێڵی سوورە" و بە هەموو شێوەیەک بەرگرییان لێ دەکەن.

 
٠ کەمپی هۆڵ لە ئێوارەی دوێنێوە ڕووبەڕووی هێرشێکی دڕندانە بە تانک بووەتەوە، کە وای کردووە پاسەوانەکان ناچار بن پاشەکشە بکەن.

٠ ئەم دۆخە مەترسییەکی گەورەی لەسەر زیندانەکانی داعش لە شەدادی دروست کردووە.

زانیاریی زیاتر: مەزڵووم عەبدی، داوای لە هاوپەیمانی نێودەوڵەتی دەکات، بەرپرسیارێتیی پاراستنی زیندانەکانی داعش هەڵبگرن، داواش لە دیمەشق دەکات، هێرشە چڕەکانی سەر حەسەکە و کۆبانی ڕابگرێت و بگەڕێتەوە سەر مێزی گفتوگۆ بۆ چارەسەرکردنی کێشەکان.

ئەمەش بزانە: فەرماندەی هەسەدە، ستایشی خۆڕاگریی شەڕڤانان و هاووڵاتییانی کرد لە بەرامبەر ئەو کوشتارە بەرفراوانەی کە ئامانجی تێکدانی سەقامگیری و لەناوبردنی دەستکەوتەکانی پێکهاتەی کوردە. دەڵێت: ئیرادەی گەل لە هەڕەشە سەربازییەکان بەهێزترە، بەڵام بێدەنگیی جیهان بەرامبەر ئەم کارەساتە مرۆییانە جێگەی نیگەرانییە و ڕێگە بۆ دووبارە سەرهەڵدانەوەی تیرۆر لە ناوچەکەدا خۆش دەکات، بۆیە پێویستە هەنگاوی خێرا بۆ پاراستنی مەدەنییەکان بنرێت.

لەلایەکی دیکە: سەرۆکایەتیی کۆماری سووریا ڕایگەیاند، لەگەڵ هەسەدە لەسەر نەخشەڕێگەیەک بۆ ئایندەی پارێزگای حەسەکە ڕێککەوتوون، کە تێیدا مۆڵەتی چوا ڕۆژ بۆ داڕشتنی وردەکارییەکانی تێکەڵکردنەوەی ناوچەکان دیاری کراوە.

ئەوەی پێشبینی دەکرێت: بەگوێرەی ڕاگەیێنراوی سەرۆکایەتی کۆماری سووریا، بەپێی ئەم لێکتێگەیشتنە، سوپای سووریا ناچێتە ناو ناوەندی شارەکانی حەسەکە و قامیشلۆ و گوندە کوردییەکان.