بەڕێوەبەرایەتیی کاروباری ئێزدییەکان: چوارشەممەی سوور هیچ پەیوەندی بە ئێزدییەکانەوە نییە

ئاڤا نیوز

 

بەڕێوەبەرایەتی گشتیی کاروباری ئێزدییەکان لە وەزارەتی ئەوقاف دەڵێت، زۆرێک لە کەناڵەکانی ڕاگەیاندن ناوی جەژنی سەری ساڵی ئێزدییان بە هەڵە کردووەتە چوارشەممەی سوور، کە ئەم ناوە هیچ پەیوەندی بە ئێزدییەکانەوە نییە.

 

وێنە گەورەکە: ساڵانێکی زۆرە وا بڵاودەکرێتەوە کە جەژنی سەری ساڵی ئێزدی و چوارشەممەی سوور بە یەک بۆنە ناو دەبرێن.

 

ڕوونکردنەوەی فەرمی: بەڕێوەبەرایەتی گشتیی کاروباری ئێزدییەکان لە وەزارەتی ئەوقاف و کاروباری ئایینی هەرێمی کوردستان، لە ڕوونکردنەوەیەکدا ڕایگەیاندووە، جەژنی سەری ساڵی ئێزدییەکان دەکەوێتە ڕۆژی چوارشەممە ڕێککەوتی (17ـی نیسانی 2024)، ئەم جەژنە گرنگترین بۆنەیە لای ئێزدییەکان، کە ناوی "جەژنی سەری ساڵی ئێزدییان"ـە، وەک چۆن لە فەرمانی پەرلەمانی کوردستان، ژمارە (16)ـی ساڵی 2010 ئاماژەی پێکراوە.

 

زانیاریی زیاتر: بەڕێوەبەرایەتی گشتیی کاروباری ئێزدییەکان باسی لەوەش کردووە، زۆرێک لە کەناڵەکانی ڕاگەیاندن ناوی جەژنی سەری ساڵی ئێزدییان بە هەڵە کردووەتە "چوارشەممەی سوور"، کە ئەم ناوە هیچ پەیوەندی بە ئێزدییەکانەوە نییە.

 

گۆشەیەکی دیکەی دیمەنەکە: سعود مستو نەجم، بەڕێوەبەری گشتیی کاروباری ئێزدییەکان لە وەزارەتی ئەوقاف بە ئاڤا نیوزی ڕاگەیاند، چوارشەممەی سوور پەیوەندی بە سەری ساڵی ئێزدییەوە نییە و لە ئایینی ئێزدیشدا تەنیا یەک قەولی ئایینی باسی چوارشەممەی سووری کردووە، بەڵام وەک بۆنەیەکی ئایینی هیچ شتێک بەو ناوەوە نییە.

 

ئەوەی پێویستە بیزانیت: بەپێی بیروباوەڕی ئێزدی، جەژنی سەری ساڵی ئێزدی، گرنگترین و کۆنترین بۆنەیە لای ئێزدییەکان، بە جەژنی دروستبوونی گەردوون دەستپێکردنی ژیان دادەنرێت.