سوودانی: لە عێراقەوە هیچ درۆن و مووشەکێک ئاراستەی ئیسرائیل نەکراوە

ئاڤا نیوز

 

سەرۆکوەزیرانی عێراق ڕەتی دەکاتەوە لە عێراقەوە هیچ درۆن و مووشەکێک ئاراستەی ئیسرائیل کرابێت. دووپاتیشی کردووەتەوە کە ڕێگە نادەن عێراق بخزێنرێتە ناو گۆڕەپانی ناکۆکییەکانەوە و پابەندن پێیەوە.

 

لێدوانی فەرمی: محەمەد شیاع سوودانی, سەرۆکوەزیرانی عێراق ڕایگەیاند، بەغدا هیچ ئاماژە و ڕاپۆرتێکی بەدەست نەگەیشتووە لەبارەی ئاراستەکردنی مووشەک و درۆن لە عێراقەوە لە کاتی هێرشەکەی ئێران بۆ سەر ئیسرائیل، هەڵویستیشیان ڕوونەوە لەبارەی ئەوەی ڕێگە نەدەن عێراق بخزێنرێتە ناو گۆڕەپانی ناکۆکییەکانەوە و پابەندن پێیەوە.

 

لەلایەکی دیکەوە: بەرپرسانی عێراقی ئاشکرایان کردووە، ئێران پێشتر لە هێرشەکەی بۆ سەر ئیسرائیل ئاگاداری کردوونەتەوە لەگەڵ چەند وڵاتێکی دیکە لە ناوچەکە. 

 

بۆچوونی لایەنی بەرامبەر: میدیای ئیسرائیلیش دەڵێت: ئیسرائیل پەیامی ناردووە بۆ هەندێک وڵاتی ناوچەکە کە هێرش دەکاتە سەر ئێران بەجۆرێک مەترسی لەسەر ئەو وڵاتانە دروست ناکات، ئەو وڵاتانەش نیگەرانن لە وەڵامی ئیسرائیل بۆ ئێران.

 

مەترسییە زانراوەکان: وڵاتەکان ترسیان هەیە ئێرانیش وەڵامی ئیسرائیل بداتەوە بەو پێیەی تاران هەڕشەی لێکردوون هەر وڵاتێک ئاسمانی وڵاتەکەی بکاتەوە بۆ ئیسرائیل دەچێتە ناو بازنەی شەڕ و ئاگرەوە.