کەشناسی هۆشداری لە بارانی بە لێزمە و هەورەتریشقە دەدات: دووربکەونەوە لە بەکارهێنانی ئامێرە کارەباییەکان

ئاڤا نیوز

شەپۆلێکی بارانبارین سەرتاسەری هەرێمی کوردستان دەگرێتەوە و کەشناسی هۆشداری لە دابارینی بەلێزمە و هەورە تریشقە دەدات.

بڵاوکراوەی فەرمی: بەڕێوەبەرایەتیی گشتیی کەشناسی بوومەلەرزەزانی هەرێمی کوردستان بڵاوی کردووەتەوە، پێشبینی دەکرێت ئەمڕۆ شەممە 14/2/2026، ئاسمان هەوری تەواو بێت و ئەو شەپۆلە بارانبارینەی لە کاتەکانی بەیانیی ئەمڕۆ سنووری ئیدارەی سەربەخۆی زاخۆ و هەندێ شوێنی پارێزگای دهۆکی گرتووەتەوە، تا دوای نیوەڕۆی ئەمڕۆ زۆربەی ناوچەکانی هەرێمی کوردستان بگرێتەوە.

- مەودای بینین حەوت بۆ هەشت کیلۆمەتر دەبێت و ئەگەری خۆڵبارین هەیە، لەکاتی خۆڵبارین مەودای بینین بۆ چوار کیلۆمەتر کەم دەبێتەوە، پێشبینی دەکرێت خێرایی با 10 بۆ 20 کیلۆمەتر بە ئاڕاستەی باکووری ڕۆژهەڵات بێت.

لەلایەکی دیکەوە: ناوەندی هاوبەشی هەماهەنگی قەیرانەکان، هۆشداری دەدات سنووری "بەردەڕەش، مێرگەسۆر، بارزان، هەریر، پیرمام، بەحرکە، بنەسڵاوە، شەمامک، دەوروبەری پردێ، چوارتا، ماوەت، قەڵادزێ، سەنگاو و تەکیەی جەباری" هەورەتریشقە و بارانی بەلێزمە دەیانگرێتەوە.

ئەوەی پێویستە بیزانیت: ناوەندی هاوبەشی هەماهەنگیی قەیرانەکان، بۆ دووربوون لە مەترسییەکانی هەورەتریشقە ڕێنمایی هاووڵاتییان دەکات، لەکاتی هەورەتریشقە ئەم ڕێککارانە بگرنەبەر:

-  ئەگەر لە ناو ئۆتۆمبێل بوویت، ئەوا دامەبەزە، چونکە پەیکەری ئۆتۆمبێلەکە جۆرێک لە پارێزگاریت پێ دەبەخشێت.

- لە شوێنی بەرز مەوەستە، ئەگەر نزیک بووی لە ستوونەکانی کارەبا و تەلەفۆن، تاوەرەکانی پەیوەندی و گەیاندن و داری بەرز، خێرا لێی دوور بکەوە و دەستبەجێ مۆبایلەکەت دابخە.

-  تا بکرێت نەچیتە شوێنە کراوەکان، ئەگەر بە ناچاری لە شوێنێکی وا بوویت، دەستبەجێ لەسەر زەوی دابنیشە و مەڕۆ تا گێژەلووکەکە کۆتایی دێت.

-  دوور بکەوە لە کەلوپەل و ئامێری ئاسنینی پەرژینەکان و هەموو جۆرە بارستە کانزاییەک.

-  لە کەناراوەکانی وەک ڕووبار و دەریاچەکان و چەم و ناوچە شێدارەکان دوور بکەوە.

-   لە کاتی نزیکبوونەوەی گێژەلووکەی بروسکە، دووربکەوە لە بەکارهێنانی ئامێرە کارەباییەکان لە دەرەوەی ماڵەوە.

-  لە هەر حاڵەتێکی نەخوازراو پەیوەندی بکە بە لایەنی پەیوەندیدار و ژووری ئۆپەراسیۆن بۆ بەڕێوەبردنی قەیران و کارەسات.