نەمسا لەچک لە منداڵانی موسڵمانان قەدەغە دەکات و ناڕەزایی لێدەکەوێتەوە

ئاڤا نیوز

 

پەرلەمانی نەمسا بە زۆرینەیەکی دەنگ بڕیارێکی پەسەندکرد بۆ قەدەغەکردنی لەچک لە قوتابخانەکان بۆ ئەو کچانەی تەمەنیان لە خوار 14 ساڵەوەیە، ئەوەش ناڕەزایی ڕەوەندی موسڵمانانی لێکەوتەوە و لە ڤیەننای پایتەخت خۆپیشاندان سازکرا.

 
چیرۆکی سەرەکی: بڕیارە لەم مانگەوە ئەو یاسایە جێبەجێ بکرێت کە لە 11/11/2025 هەموارکرایەوە لە پەرلەمانی نەمسا و چیتر ڕێگە نادرێت لە خوێندنگەکاندا منداڵی خوار تەمەن 14 ساڵان سەرپۆش لەسەر بکەن، بە پێچەوانەوە ئیدارەی قوتابخانەکە لەگەڵ کچەکە و دایک و باوکی کۆبوونەوەیەک ئەنجام دەدەن، ئەگەر کچەکە بەردەوام بوو لە باڵاپۆشی، پێویستە دایک و باوک پەیوەندی بە دەسەڵاتی پەیوەندیدار بە قوتابخانەوە بکەن، لە کۆتاییدا وەکو تاوان مامەڵەی لەگەڵ دەکرێت و بڕی غەرامەی تا 800 یۆرۆ (931 دۆلار) بۆ ئەم تاوانە دەستنیشان دەکرێت.

 

لێدوانی فەرمی: کلاودیا بلاکهۆڵم، وەزیری یەکگرتن و پێکەوەبوون لە نەمسا، وتارێکدا بۆ پەرلەمانی وڵاتەکەی، ئەو هەنگاوەی بە هەنگاوێکی مێژوویی بۆ پاراستنی کچان وەسف کرد.

 

بلاکهۆڵم، ئەندامی پارتی موحافیزکاری گەلی نەمسا دەڵێت: سەرپۆش و باڵاپۆشبوون پارچە قوماشێکی بێ زیان نییە، بەڵکو "هێمای ستەمکارییە" و نابێت هیچ کچێک لە نەمسا بەو باوەڕە گەورە بکرێت کە دەبێت جەستەی بشاردرێتەوە. 

 

کاردانەوە: ئەم بڕیارەی پەرلەمانی نەمسا، ناڕەزایی بەشێک لە گروپەکانی مافی مرۆڤ و گرووپە موسڵمانەکان و شارەزایانی بە دوای خۆیدا هێناوە و ئەوان دەڵێن ئەمە جیاکارییە و دابەشبوونی کۆمەڵایەتی قووڵتر دەکاتەوە و سەدان کەس لە ڤیەننای پایتەختی نەمسا بۆ دەربڕینی ناڕەزایەتی لە دژی یاساکە خۆپیشاندانیان ئەنجام دا.

 

لێدوانی خۆپیشاندەر: مارلێن مێلچەر، خانمێکی موسڵمان کە خەڵکی نەمسایە و باڵاپۆشە و بەشداریی خۆپیشاندانەکەی کردووە، وتی: "زۆر شۆک بووم، بڕیارەکە بە جۆرێک دەمترسێنێت کە دەڵێم کە تەنانەت ئێستاش، لە ژیانی ڕۆژانەدا جیاکاریمان لەگەڵ دەکرێت و بڕیاری پێشوەختە لەسەر ئەو کەسانەی دەدرێت کە سەرپۆش لەسەر دەکەن.  کاتێک بوومە باڵا پۆش، لێیان پرسیم: 'ناچاریان کردوویت؟' بۆیە دەبێت بۆیان ڕوون بکەمەوە کە ناچار نەکراوم، ئەمەش ڕەوا نییە".

 

زانیاری زیاتر: خۆپیشاندەران دەڵێن پێش دەرچوونی ئەم یاسایەش بە چاوی جیاکارییەوە سەیری کچە باڵاپۆشەکان کراوە و ماف و ئازادییەکانیان پێشێلکراوە، ئێستا یاساکە ئەم پێشێلکارییانە دەکاتە شتێکی یاسایی و گوشارێکی زیاتر بۆ سەر موسوڵمانان دروست دەکات.

 

مەلیکە ماتایڤا، ژنێکی دیکەی موسڵمان بوو کە بەشداریی خۆپیشاندانەکەی کردبوو، دەیوت: "ئەمە لەخۆڕا و لە هیچەوە نەهاتووە، چونکە ئەم کچانە، بەتایبەتی ئەوانەی لە قوتابخانەکاندان، ساڵانێکە ڕووبەڕووی جیاکاری و ڕەفتاری ڕەگەزپەرستانە بوونەتەوە. ئەمەش تەنیا هەنگاوێکی دیکەیە کە وامان لێ دەکات بڵێین: ئیتر بەسە، چونکە تەنانەت یاساکان و ئازادییە گەرەنتی کراوەکانیش ڕێزیان لێ ناگیرێت، ئەمەش ڕێک ئەو شتەیە کە ئێمە داوای دەکەین."

 

باکگراوند: جێبەجێکردنی ئەم یاسایە لە نەمسا، نزیکەی 12 هەزار کچە قوتابیی خوار 14 ساڵ دەگرێتەوە کە لەچک لەسەر دەکەن و دووچاری گرفتی یاساییان دەکاتەوە.